USA ka kongresman nga nagbuhi og pulong nga dapat daw i-postpone ang 2022 nasyunal ug lokal eleksyon tungod niining pandemic ug kini mao si Pampanga Congressman Mike Arroyo.
Pero matingala ka, nganong gihatagan og dakong atensyon sa ubang mga magbabalaod sa kongreso ug senado, nga bisag unsaon dili ug dili manggyud kana mahitabo?
Gawas lang kon adunay katalagman nga mugna sa panahon, o force major, gani, bisan pa og mugna sa panahon, linog, bagyo, baha, dili na tibuok nasud nga mahitabo, kon dili pipila lang ka dapit sa Pilipinas?
Kon rebelyon pud ang basihan, naa nay rebelyon sa atong nasud dugay ra, apan tua ra sa mga hilit nga mga barangay ang gikontrolar sa mga rebelde?
Kon pandemic sab ang basihan sa usa ka congressman, nahusay na kita niana pinaagi sa mga health protocols? Ang social distancing kana gihapon ang mahimong i-apply pag-abot sa piniliay, ug tama ang giluwatang pahayag sa Commission on Elections (Comelec) nga kon dili madala sa usa ka adlaw, pwedeng duha ka adlaw ang eleksyon nungka nga i-postpone.
Sumala pa sa usa ka abogado nga atong gipangutana, naanad lang ning pipila ka mga congressman, ang pag-postpone sa Barangay Elections, tungod kay sila ma’y magbuot ana, kon kanus-a nila i-postpone, o kanus-a pud nila ibalik, apan, nakalimot si Mike Arroyo nga dili pwedeng i-postpone ang mandato sa atong Constitution.
Kon ang pandemic maoy basihan nga i-postpone ang eleksyon nga mando sa atong batakang balaod, nganong wala man na-postpone ang eleksyon sa Estados Unidos nga gitakda karong bulan sa Nobyembre niining tuiga, nga minilyon ang nagpositibo sa virus ug 200,000 ka mga tawo ang nangamatay didto sa ila?
Duna gyuy politiko nga kon mahimo palang, wala na’y eleksyon aron magpabilin sila sa posisyon, para kanato, dili kita angay mabahala, kay dili mahitabo nga ma-postpone ang umaabot nga eleksyon gumikan lang sa mabaw kaayong katarungan; ang Covid-19, kay layo paman ang tuig 2022, what if, kon mawala ni siya niining tuig? O kaha sa 2021?
Ang walay eleksyon sa 2022, usa ka mabaw nga pangagpas sa usa ka congressman nga daw sa gitagna na kon unsay mahitabo ugma; ning panahon sa pandemic daghan pang mga balaodnon nga angayan tun-an sa mga Kongresista nga ikatabang sa katawhan taliwala sa atong giatubang nga problema, ug dili ang pag-postpone sa piniliay.
Dili sab dapat mabalaka ang mga eksperto sa atong batakang balaod kay dili manggyud kana mahitabo, sa atong pangagpas buot lang magpapansin si Mike Arroyo.
Unsay gitubag niya sa dihang gi-interview siya suggestion lang daw o sugyot ang iyang gihimo, buot ipasabot, siya mismo nahibalo nga dili ug dili gyud na pwede nga pinaagi lang sa pagpasa og balaodnon aron wagtangon ang mandato sa atong balaud.
Ang trabaho sa usa ka magbabalaod, mao ang pagpasar og mga balaod nga magsunod sa atong batakang balaod, dili kay supakon kon unsa may gimbut-an dinhi.