NABAWI sa kapolisan sa Bansalan, Davao del Sur ang usa ka eksplosibo human aduna’y nakakita nga giduwaan kini sa duha ka menor de edad nga lalaki alas 9:30 sa buntag, Sabado, Septiyembre 26, 2020.
Gibutyag ni Major Peter Glenn Ipong, hepe sa kapolisan ning lugar, nakadawat sila og tawag gikan sa usa ka Bert Ulanda, 42, minyo nga clerk sa Regional Trial Court Branch 61 sa Digos City, ug nagpahibawo nga aduna’y granada nga nabangalan sa mga menor didto sa atubangan sa iyang balay sa Purok 5, Barangay Mabuhay.
Sa pag-responde sa kapolisan, narekober nila gikan sa mga menor ang gihuptan nga M26 fragmentation grenade.
Atol sa imbestigasyon, gitug-an sa duha nga nabangalan nila ang eksplosibo didto sa usa ka sapa sa lugar mao nga ilang gipunit.
Nanaghap ang kapolisan nga nahagbong sa mga sakop sa militar ang granada atol sa operasyon.
Gitunol na sa kapolisan ang eksplosibo ngadto sa Provincial Explosive and Canine Unit.
Dako ang pasalamat sa kapolisan nga wa makaboto ang granada sanglit magdala kini og peligro ngadto sa mga menor ug mga molupyo sa lugar.