GIPALUKAPA ni Filipino John Riel Casimero si Ghanaian Duke Micah aron depensahan iyang World Boxing Organization (WBO) bantamweight title kagahapon (RP time) sa Mohegan Sun Casino sa Uncasville, Connecticut, USA.

Tulo lang ka rounds lang ang gikinahanglan ni Casimero aron ipakita sa tibuok kalibutan kon unsa ang kalidad sa iyang kusog human niya gipaulanan og kumo si Micah aron idominarar ang tibuok tulo ka rounds.

Wa na makaantos sa iyang nakita si referee Steve Willis og nakahukom kini nga ihunong na ang duwa sa unang minuto sa third round human maigo si Micah og sunod-sunod nga kumo og makusog nga left hook.

Mao kini ang unang away ni sa three-division world champion Casimero sa MP Promotions nga gipakita sa pay-per-view sa Amerika.

Sa post-fight press conference, gibutyag ni Casimero nga wa siya magdahom nga malup-og ang kanhi Olympian sulod lamang sa tulo ka rounds. Nagtuo siya nga maabot ang ilang away sa 12 ka mga hugna.

Matod niya, nga sa dihang nakaigo siyag solido nga kumo kang Micah sa first round nakaingon siya nga gahi kini nga boksidor kay wala man matumba.

Sa ikaduhang round, napatumba ni Casimero si Micah pinaagi sa iyang left hook. Nakabarog man tuod si Micah apan tataw nga grabe ang pagkarugi niini ug

maayo na lang kay nakaabot pa kini sa bagting.

Ang lumad nga taga Ormoc City nagtuo nga mokaon og kumo ang Ghanian fighter ug ang referee na lang ang nakadesisyon nga undangon ang away aron ilikay si Micah sa mas grabe pa nga bun-og.

Si Casimero misaka sa 30-4, 21KOs nga rekord samtang si Micah nakaangkon sa labing una niyang pilde ug nahagsa sa24-1, 19KOs nga baraha.

Sa iyang kadaugan, wa kalimti ni Casimero nga hisgotan ang gipangandoy niyang makontra nga si Japanese Naoya “Monster” Inoue.

Iya kining gihagit ug gisungog nga dili kini tinuod nga “Monster” kay nahadlok kaniya.

“You’re not a monster, you’re just a Japanese turtle,” sungog ni Casimero. “You’re next.”

Si Casimero naabot sa Estados Unidos niadtong Pebrero niining tuiga aron unta pangandaman ang ilang away ni three-division world champion Inoue nga gikatakda niadtong Abril. Apan tungod sa pag-abot sa pandemiya, nasibog kini sa Agusto hangtod nga nakanselar ra kini.

Si Inoue moaway kang Jayson Moloney karong Oktubre 31, 2020.