DRAYBER sa trak nga gikargahan sa crane ug usa ka pahinante niini, ang angol human napiit sa crane nga nasangit sa skywalk sa Barangay Banilad, dakbayan sa Sugbo kagahapon sa hapon, Septiyembre 27.
Si Police Staff Sergeant Ryan Perez sa Traffic Patrol Group nga maoy unang miresponde sa lugar, niila sa mga nangaangol nga sila si Wendell Nino Franco, drayber ug David Lawas, pahinante. Ang duha pulos mga hingkud ang edad.
Matod ni Perez, sa iyang pagpangutana sa mga nitubag nga emergency personnel, ang duha dunay gipamati nga sakit sa ilang likod.
Si Loth Tabuco, usa sa mga kauban sa duha, kinsa sakay usab sa trak, nibutyag nga gikan sila sa Barangay Talamban ug pauli na unta sa dakbayan sa Talisay.
Apan wala sila magdahum nga sa ilang pag-uli, masangit ang crane nga ilang dala nga sakay sa maong trak.
Samtang, dako usab ang pasalamat ni Tabuco nga wala ra siya maigo sa crane sanglit niadtong tungora anaa siya sa atubangan sa crane nga kon mahundos paingon sa iyaha, maigo ang iyang likod.
Si Tabuco nakaangkon lang og pangus sa iyang tuhod.
Atol ning pagsuwat, nagpadayon pa ang imbestigasyon sa kapulisan. (BBT)