ANG Mandaue City government ni-award na sa mananaug nga bidder sa 590 ka laptops ug 5,000 ka tablets nga nagkantidad og P112 million sa pagsuporta sa paningkamot sa dakbayan sa new normal education nga moabli na karong Oktubre 5, Lunes.
Nasayran sa Superbalita Cebu nga ang bidding gihimo niadtong Martes, Septiyembre 22.
Si Atty. John Eddu Ibañez, executive secretary ni Mandaue City Mayor Jonas Cortes, nagkanayon nga ang IT equipment na-bid out sa Department of Education (DepEd) Mandaue Division nga naghimo na karon og criteria o basihanan kon kinsa ang makakuha sa gadgets.
Si Ibañez nagtuo nga ang tanang public schools teachers makadawat og laptop nga ilang magamit sa online distance learning human ang DepEd-Mandaue mao ang naghatag og request alang sa pagpalit diin ang pundo gikan sa Special Education Fund.
Sa mga tinun-an, ang DepEd-Mandaue maghimo og laing criteria diin ang mga tinun-an sa public elementary ug high school mahimong maka-apply sa pag-angkon sa gadget.
Ang specs sa tablets naa sa two-in-one, usa ka tablet attached sa keyboard nga mahimo usab magamit isip laptop.
Ang learning applications ug modules gi-download na sa tablets ug bisan unsang application nga dili related sa educational use dili mahimong ma-install sa tablet.
Si Ibañez nipaklaro nga ang gadgets gihatag usab sa pagsalig sa benepisaryo nga gipahuwam lang sa gadget busa dili pwede mabaligya o prenda.
Si Ibañez nagkanayon nga dunay 15 ka adlaw sa notice to proceed apan karon, nga na-bid out na, ang proseso mas hapsay ug ang gadgets gipaabot nga moabot sa dili pa ang Oktubre 5. (KFD)