NAGPLANO ang Mandaue City Police Office (MCPO) nga magpahigayon og virtual meeting sa tanang mga security provider sa dakbayan sa Mandaue.
Kini tungod kay nagsugod na ang “ber” months diin ang tulis ug kawat mas mokusog na sad.
Matod ni PCol. Jonathan Abella, hepe sa MCPO, makig-alayon sila sa mga security provider sa mga establisemento aron pangandaman ang mga krimen sama sa tulis ug kawat.
Nagplano si Abella nga tapukon ang tanang security provider pinaagi sa matag estasyon.
Sigon ni Abella nga hatagan niya og direktiba ang matag estasyon nga makig-abot ngadto sa mga security provider sa ilang hurisdiksyon isip pagpangandam sa “ber” months.
Dugang niya nga pagahimuon sab gihapon nila ang naandan nga roving operation ug pagtambay og pipila ka minutos sa mga establisemento apan mas pahugtan pa kini.
Sa ilang pag-roving, matod niya, pangumustahon nila ang mga gwardya kon wala ba kini mga namatikdan nga kadudahang mga personalidad.
Gani hatagan sab nila og mga litrato sa mga personalidad nga posibleng mopasiugda og pagpanulis o kawat sa ilang establisemento.
Bisan paman nga wala pa silay nadawat nga taho sa mga susamang krimen, padayon gihapon ang ilang pagpangandam ug pagpahugot sa seguridad sa siyudad.
Karon nga wala pa sab nabalik ang mga pampublikong transportasyon sama sa jeep, wala pa sab silay nataho nga pagpanulis sulod sa mga transportasyon.
Niadtong anaa pay jeep, sagad sa mga salisi o pagpanulis mahitabo sulod sa jeep.
Karon sa mga bus, wala pa silay nataho nga pagpanulis tungod daghan ang mga magbantay labi na sa konduktor sulod sa bus ug konduktor sa mga bus stop, sigon ni Abella.
Dugang niya, lakip kini sa ilang pagabantayan ang pampublikong sakyanan. (KFD)