USA ka negosyante og ukay-ukay ang gipusil-patay sulod sa iyang giabangang balay sa Purok Nara, Sitio Simboryo, Barangay Tayud, lungsod sa Liloan, Sugbo niadtong Sabado, ala 1:30 sa hapon, Septiyembre 26, 2020.
Si Maria Victoria Lingal, 41, biyuda, patay dihadiha human nakaangkog duha ka samad pinusilan sa ulo.
Ang kapulisan nakakuha sa crime scene og duha ka slugs sa kalibre .45.
Si Police Staff Sgt. Nelson Sadile, imbestigador sa Liloan Police Station nga nahinabi sa Superbalita Cebu, nagkanayon nga ang biktima bag-uhay lang naabot.
Kalit sab nga naabot ang duha ka mga mamumuno nga pulos naka-bonnet ug nagtagsa og sakay og motorsiklo nga Yamaha Mio kolor yellow ug Smash nga kolor puwa.
Ang duha ka mga armadong tawo nanganaog sa motorsiklo ug nisunod sa giagian sa biktima.
Tungod kay sudlunon ang giabangang panimalay, ang usa ka lalake nagpabilin sa dalan ug ang laing usa maoy nisulod ug nipusil sa biktima.
“Kusog kaayo ang uwan niadtong higayuna mao rato nakita sa mga silingan nga dunay duha ka lalake, nagtagsa sa motorsiklo, misunod dayon buto-buto,” dugang ni Sadile.
Wa masayod ang mga silingan nga ang biktima mao diay gipusil.
Wa sab nila maklaro ang mga nawong kay naka-bonnet unya kusog kaayo ang uwan.
Sa pagkakaron, ilang gitan-aw ang tanang anggulo sa krimen.
Usa niini ang ‘love triangle” kay nahibaw-an sa kapulisan nga human mabiyuda, dunay gikarelasyon ang biktima, unya nagkabuwag, duna na usab karoy bag-ong lalake nga mag-anhaan sa iyang gipuy-an.
Ang anak niini nga 22 anyos nga lalake nga nagpuyo sa pikas lawak, naglibog sab unsay rason nganong gipatay ang iyang inahan.
Gipadayag niini sa kapulisan nga tagsa ra sila magkuyog sa iyang inahan. Wala sab kiniy gisulti kon dunay hulga sa kinabuhi.
Ikaduhang motibo nga subayon sa kapulisan ang negosyo sa biktima.
Duna kiniy tindahan sa “ukay-ukay” sa dakbayan sa Mandaue, hinungdan nga ilaha usab kining susihon kon wala bay gikabangi.
Matod ni Sadile, sa ilang initial nga pagkuhag background check sa biktima, wala kini nalambigit sa illegal nga kalihukan. Gipadayag niini nga mangita pa silag dugang testigos sa kaso.
Dugang niini nga gi-timing gyud sa mga mamumuno ang pagbunok sa uwan dihang gipusil ang biktima.