SUPERBALITA CEBU

Pista ni Sr. Santo Niño saulogon haom sa panahon sa pandemiya

■ PROSISYON: Ang prosisyon sa imahen ni Sr. Sto. Niño sa siyudad sa Sugbo nga gidugok sa minilyon ka debotos. / SunStar File Photo

IPAHAOM sa panahon nga mga espiritwal nga aktibidades sa Basilica Minore del Sto. Niño (BMSN) ang naghuwat sa mga pilgrim ug debotos sa imahe sa Balaang Bata alang sa Sinulog 2021 nga ipahigayon sa matag ikatulong Dominggo sa Enero.

Gipasalig ni Rev. Fr. Ric Anthony Reyes, OSA gikan sa BMSN, atol sa launching sa social media activities alang sa umaabot nga ika 500 ka tuig sa Kristiyanismo sa nasod, niadtong Sabado, Septiyembre 26, 2020, nga bisan pa man sa pandemya sa Covid-19 karon, padayon gihapon ang pagsaulog sa tinuig nga Sinulog isip usa sa highlights sa ika-500 nga tuig sa kasaulogan sa pag-abot sa Kristiyanismo sa nasod.

Matod ni Reyes, padayon ang pagpakig-alayon nila sa Cebu City Government ug aduna nay mga inisyal nga gitanyag nga mga aktibidad nga ikahulip sa naandan na nga mga aktibidad atol sa relihiyoso nga selebrasyon. Kini nga mga relihiyoso nga aktibidad gipaningkamutan nila nga mahaom sa security protocol nga gipatuman sa siyudad.

Wala pa hinuon niya gitagsatagsa ug gihinganlan ang maong mga aktibidades sa simbahan kay wala pa man kini mahingpit, matod niya.

“Kani tanan, naa pa sa level sa proposal. Tungod kay dili pa gyod ni siya ingon official, ang ako lang masulti is this, first, naa gihapon tay mga equivalent nga mga celebrations kung unsay atong naandang buhaton,” dugang niya.

“So, kung naay Walk with Jesus, Walk with Mary, naa siya’y equivalent nga atong buhaton,” dugang niya.

Sigon niya nga lakip sa mga unang nahisgutan mao ang posibleng pagsubay og mas taas nga rota kung adunay prosesyon o motorcade nga pagabuhaton aron sab mas daghang mga debotos ang makakita sa imahen ug mas mamintenar ang social distancing.

Dugang ni Reyes, namalandong sila nga ang Sugbo ug ang tibuok nasod mapaubos na unta sa new normal nga sitwasyon sa umaabot nga Enero 2021, kay nakadepende man usab sa community quarantine status nianang buwana ang mga final nga detalye sa mga aktibidad nga pagabuhaton.

Sa miaging Enero 9 ning tuiga, di mominos sa 300,000 ka mga deboto ang nitambong sa “penitential procession” kun “Walk with Jesus” nga nanukad sa Fuente Osmeña ngadto sa BMSN, ug sa “Walk with Mary” nga gihimo human ang walo ka adlaw.

Dugang ni Reyes nga anaa gihapon ang mga misa nobenaryo sud sa siyam ka adlaw sa dili pa ang adlaw sa kapistahan sa imahe sa Balaang Bata.

Ang pag-abot sa imahen sa Balaang Bata sa Cebu, ang pinakauna nga bunyag, ug ang pinakauna nga misa sa Limasawa, Leyte, mga konektado ug lakip sa mga importante nga hitabo sa kasaysayan sa pagpakaylap sa Kristohanong pagtuo sa nasod ug sa Sugbo.

Ang orihinal nga kapistahan sa imahe sa Balaang Bata kay matag Abril 28, apan pinaagi sa pagtugot ni Pope Innocent the XIII niadtong 18th century, gibalhin ang kasaulogan ngadto sa ikatulo nga Dominggo sa Enero aron sab dili mabanggaan niini ang “Eastertide” o ang “50-day period” gikan sa Easter Sunday ngadto sa Pentecost Sunday.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph