GIPUN-AN og laing 14 ka adlaw nga pagka-lockdown ang Purok Kwatro, Barangay Cubacub, Mandaue City human adunay usa nga nagpositibo na sab sa coronavirus disease 2019 (Covid-19) sa lugar.
Niadtong Agusto 29, 2020, na-lockdown ang 45 ka mga balay ug 200 ka indibidwal nga nahimong persons under monitoring (PUMs) human usa ka 50-anyos nga lalake namatay ug nahibaw-an nga kini positibo sa virus human sa tulo ka adlaw nga haya niini.
Gipaubos sa swab test ang upat ka miyembro sa pamilya sa namatay diin ang anak niini nagpositibo.
Matod ni Almario Bihag, kapitan sa Cubacub, nga gipun-an og 14 ka adlaw nga pagka-lockdown ang lugar human nagpositibo ang usa ka contact sa anak sa namatay.
Nahuman na unta niadtong Septiyembre 12 ang pagka-lockdown sa lugar apan tungod napun-an na sab ang nagpositibo sa dapit hinungdan nga gipun-an kini og laing 14 ka adlaw.
Ang bag-ong nagpositibo usa ka 13 anyos nga lalake, silingan sa namatay ug nakatambong kini sa haya niini.
Usa siya sa 13 ka mga direct contact sa anak sa namatay nga nagpositibo sab.
Anaa karon ang 13 anyos nga batang lalake sa Mandaue City Central Isolation Unit.
Matod ni Atty. Julius Ceasar Entise, nangulo sa contact tracing team sa dakbayan sa Mandaue, sa 13 nga ilang gi-schedule aron pag-swab, lima niini wala motugot nga magpa-swab.
Dugang ni Entise nga usa sab kini sa rason nga ilang gi-extend ang pag-lockdown sa lugar tungod dili sila mokompiyansa nga ipasaka ang lockdown unya wala pa mapamatud-i nga wala nay laing positibo sa lugar.
“Until such time nga ma-swab na sila tanan contacts and mag-negatibo na sila, diha na i-lift ang lockdown,” sigon ni Entise.
Sa laing bahin, adunay say laing nagpositibo sa Barangay Cubacub nga anaa sa Purok Dos, apan sigon sa kapitan nga si Bihag nga wala kini kalabutan sa Purok Kwatro nga mga kaso.
Gani usa kini ka babaye nga buntis, diin nagpositbo siya human gi-swab sa wala pa kini manganak.
Kasamtangan kining na-admit sa usa ka hospital sa dakbayan sa Sugbo ug ang balay niini gipaubos sab sa lockdown.
Sa pagkakaron, adunay tulo ka aktibo nga kaso sa Covid-19 sa barangay ug usa ang namatay. (KFD)