Editoryal: Luna sa kagamhanan

Editorial Art by Ariel Itumay
Editorial Art by Ariel Itumay

ANG komplikasyon sa paggamit sa luna sa PC Hills sa kagamhanan sa Barangay Apas sa dakbayan sa Sugbo nga gitagana alang sa mga aktibong pulis walay kalahian sa problema sa ubang luna sa kagamhanan. Ang nag-unang hinungdan nga way tino nga monitoring sa bahandi sa departamento. Gipasagdan sa dugay nang panahon.

Apan dili mahimo maangkon sa pribadong indibiduwal human wala gisibog sa Philippine National Police (PNP) ang ilang katungod sa dapit. Miabot usab ang panahon nga dunay plano ang liderato sa rehiyonal nga buhatan sa pag-ugmad sa dapit.

Sa lagda sa Police Regional Office (PRO) 7, way sibilyan ang tugotan nga makapuyo sa ilang luna gawas sa mga sundawo o kapulisan ug labaw nang gihimo kining negosyo sa uban.

Apan dili kita makabasol sa mga retiradong kapulisan nga nagpabilin sa dapit nga nagsugod na sa iyang pamilya, nanganak ug nangapo na. Pwersado ba silang papahawaon sa dapit? Dili usab makiangayon gawas niadtong ordinaryong molupyo o walay koneksiyon sa pagka pulis nga nagpuyo sa dapit.

Hinuon, si Police Brigadier General Albert Ignatius Ferro, direktor sa PRO 7, nipasalig sa paghatag og relocation site sa mga mapapahawa sa dapit. Malinawon nga nakigsabot si Ferro aron mapasabot ang mga namuyo sa luna nga di sila mahimong mogamit niini tungod kay ang aktibong personnel lang ang makagamit sa maong luna.

Sama sa ubang luna sa kagamhanan o bisan sa pribadong luna nga napuno sa squatters, lisod na papahawaon. Organisado ug mosukol sa demolisyon. Mogamit sa ilang tawhanong katungod. Mangayo na og bayad ug relocation site.

Ang leksiyon, kinahanglan na dunay ahensiya sa kagamhanan nga nagtutok o mag-monitor sa luna sa kagamhanan. Usa o duha pa lang ang ilegal nga nag-okupar, papahawaon na. Dili usab sila magamit sa pulitikanhong interes o idelohiya sa pipila ka grupo ang kahuyang sa mga kabus sa dakbayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph