SUPERBALITA CEBU

Nadela: Di pa gyud angay nga kompiyansa

Asoy Ni

NAKAKITA ko og mga batan-on nga nagwarawara sa karsada nga wala magsul-ob og face mask. Ambot og unsay nasud sa ilang mga ulo nga giyamayamaan ra man ang mga protocol sa panglawas taliwala sa pandemya. Nagkuha na unta ko sa akong cellphone gikan sa sakyanan sa akong higala nga maoy akong kuyog niadtong adlawa, kalit lang nawagtang sa akong panan-aw.

Matod sa nanuroy og taho, nanakay og duha ka trisikad ang mga batan-on padung sa usa ka sudlonon nga bahin di layo sa port area sa dakbayan sa Sugbo. Akong gipaambit kining maong kasinatian sa laing higala. Ang iyang sulti nga wala siya mahibulong kay mao na ni ron ang talan-awon sa halos tanang suok dinhi sa ato. Gilapas ang social distancing apil na ang di pagsul-ob og face mask. Kamo nalay mag-igo kon nagsulti ba sa tinuod ang akong higala.

Lili-a daw ang inyong palibot kong nagsulti ba siya sa tinuod. Kon akoy pangutan-on, medyo niluag ang pagpakabana sa uban labi na sa aspeto sa social distancing. Naa pa man gud ang makamatay nga virus. Karon na hinuon ta mokompiyansa nga taas na kaayo na ang atong sakripisyo pagpakig-away sa Covid-19.

Maluoy sab ta sa medical frontliners nato. Kanus-a man nato na sila papahulayon apil na ang mga kugihan nga tanod ug mga sakop sa Philippine National Police nga way kaluya sa pagsigi og patuman sa health ptotocol. Sa tinud-anay di pa gyud ta angay nga mokompiyansa rong panahona.

Dinhi sa dakbayan sa Sugbo, kadtong nangpangedaron og 21 paubos ug 60 pataas, did-an sa pagsud sa mga sementeryo samtang nagkaduol na ang kalihukan sa kalagkalag. Sa ato pa ang mga lolo ug lola diha apil na ang mga apo nga nagplano nga mobisita sa mga sam-ang, di na lang mopadayon. Kini tungod kay apil na ning mga lugara nga gipabantayan sa mga pulis ug tanod.

Kasabot ta nga haw-ang kaayo alang sa tanan nga hasta ang paghandum sa mga nitaliwan nga mga minahal sa kinabuhi lakip nga idili. Kaniadto bisan may gipamati ta sa lawas, di makapugong pagdagkot og kandila sa mga lubnganan sa atong kabanay sa nagkadaiyang sam-ang. Bisan ang mga katalagman di babag pagtuman ning naandan nga kalihukan matag tuig. Ang mga terminal sa bus ug ayroplano, pantalan mamuwak sa daghang pasahero kay gustong mamauli sa tagsatagsa ka probinsiya para sa kalag kalag.

Nakahinumdom mo sa taas kaayong linya sa mga pasahero diha North ug South bus terminals kaniadto? Di makalimtan nga kasinatian nga bisan gipangbikogan na og binarog, gusto gyud nga makasakay bahala na og magabhian. Kutob nalang ta sa paghandum, apil na ang mga nindot nga kasinatian og lamian nga putahi nga idalit matag kalagkalag sa probinsiya. Ang binas-oy, adobo, humba ug ubang putahi makamingaw di ba?

Salamat sa pag-abi-abi ni Insoy Niñal ug sa iyang pamilya human mi magkita sa makadyot sa lungsod sa Pinamungajan. Gikan mi nga nagpamisa para sa ika-14 ka tuig nga kasumaran sa kamatayon sa among amahan mao nga nihapit mi sa ilang balay sa Poblacion. Sa iyang fans sa banda nga Missing Felimon, malipayon nakong ipahibalo ninyo, lingaw ra gyud kaayo ang inyong idol ning iyang hukom nga adto na manimuyo uban sa iyang pamilya sa iyang yutang natawhan. Estoryahan unya nato ang uban niyang gikalingawan didto.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph