Ang pugante ug kanhi barangay kapitan sa Lugo, Borbon, amihanang Sugbo napatay sa usa ka manhunt operation sa joint team sa kapulisan sa mga alas 7:40 sa buntag sa Lunes, sa Barangay Minoyan, Murcia, Negros Occidental.
Ang suspek giila sa Negros Occidental Police Provincial Office (NOPPO) nga si Jennifer Mercader, 44, kinsa nakapuga sa Medellin District Jail niadtong Marso 5, 2020. Si Mercader usa ka high value target.
Matod sa pasiunang police report, ang police team nga gilangkuban sa Police Regional Offices 6 ug 7 ug Murcia Municipal Police Station giingong gipamusil ni Mercader dihang nakabantay sa ilang presensya.
Nibawos ang mga pulis nga niresulta sa iyang kamatayon.
Nakuha gikan kang Mercader ang walo ka putos sa gituohang shabu nga gibana-banang balor og P472,000, usa ka kalibre .45 nga pistola ug usa ka 12-gauge shotgun. (BBT)