Roldan: Padada Historical Society

MALIPAYONG pagsaulog sa pista ni Senyor San Miguel! Sa Kristiyano-Judeo nga tradisyon, si San Miguel maoy usa sa mga arkangel o matawag nato nga heneral, labaw'ng sundalo, kapatas, sa gingharian sa kalangitan nga manalipod niini batok sa mga kaaway.

Gipakita kanato sa pagtulon-an nga adunay nagpadayong dakong bugno o giyera sa kalangitan tali sa maayo nga gipamunoan sa usa ka Diyos ug sa dautan nga gipangulohan ni Satanas nga gitaway sab og yawa.

Nagsugod kining ilang away sa wala pa ang kalibutan. Sa dihang gimungna ang Diyos ang kawananang, yuta, tubig ug sa mga butang niini apil ang tawo nga mabasa nato sa Genesis, nagpadayon ang ilang away dinhi sa kalibutan.

Nahimong instrumento si San Miguel sa paglaglag sa Diyos sa yawa gikan sa langit nganhi sa kalibutan. Makita kini sa mga relihiyusong istatuwa og debuho diin gitumban ni San Miguel ang bitin nga nagsimbolo sa yawa samtang ang iyang tuo nga kamot nagbitbit og nagdilaab nga espada nga andam mokutlo sa liog niini.

Sa laktod nga pagkasulti, nahimong patron si San Miguel sa mga dapit nga naghandom og kalinaw sa ilang kinabuhi. Sa dako nilang pagtuo, tabangan sila ni San Miguel sa pagsumpo sa dautan ug sa bisan unsang hadla gikan sa kaaway.

Mao nga nagsalig ang mga katawhan sa lugar diin nahimong patron si San Miguel nga dili sila talikdan ilabi na sa panahon sa katalagman ug hadla sa kasamok. Ug siyempre tungod kay pista man, seguradong naay gipang-andam nga putahi alang sa pamilya ug mga bisita.

Apan lagi kay anaa man kita sa pandemya, nagpadayon gihapon ang atong pagsunod sa distansya, pagtaptap sa nawong, pagpanghugas sa kamot ug magpundo sa balay.

Sama sa mga nangaging importanteng okasyon sama sa Araw ng Davao sa Marso ug Kadayawan sa Agosto, morag mingaw ang mga pista karon sa syudad ug kabukiran. Ambot kaha diha sa lungsod sa Padada kung bibo ba?

Pero bisan walay dakong hikay, morag madayon ang panagtigom sa naghunahuna sa pagtukod og Padada Historical Society nga nagplano nga magsulat og libro kabahin sa kasaysayan sa maong lungsod.

Siyempre anaa diha sila si Alan Hemandas, Zaldy Garrote ug ang batan-ong Provincial Information Officer sa Davao del Sur nga si Sherwin Cesar LPT. Buot sa maong grupo nga dunay ikabilin nga importanteng basahon nga mahibal-an ug masundan sa bag-ong henerasyon ang kasaysayan sa lugar nga ilang gihimugsuan.

Nindot nga masayran sa kadaghanan kung giunsa namugna ang lungsod ug kinsa ang mga nagtabang nga mahimo kining bantugan karon. Magamit usab kini alang sa pagpalambo sa turismo dili lang sa Padada kondili sa tibuok probinsya sa Davao del Sur.

Ang unang proyekto niini mao ang pagsulat og libro ug posibleng may mga kalihukan pa kining buhaton alang sa kalambuan sa lungsod. Busa giawhag sa grupo ang bisan kinsang interesado nga moapil nga makigkita lamang ni Zaldy Garrote sa iyang studio diha sa Burgos Street.

Kadto usab nga may mga karaang litrato o basahon kabahin sa Padada nga ipaambit nila aron mabutang kini sa atong basahon. Viva Senyor San Miguel!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph