BAG-ONG natawo nga bata nga lalake gibilin lang sa lamesa sulod sa public market sa Barangay Poblacion, lungsod sa Barili.
Ang masuso nga gihulagway maayo og panglawas nakit-an mga alas 8:35 sa gabii niadtong Sabado, Septiyembre 26, 2020.
Sila si Darwin Porlacen ug Marvin Gimena, pulos taga Barangay Gunting, maoy nakakita sa masuso nga naghilak sa ibabaw sa usa ka lamesa sud sa merkado.
Ang masuso basa pa sa taguangkan nga timailhan nga bag-uhay kini nga natawo.
Si Police Staff Sergeant Mark Anthony Fat, sa Barili Police Station nga nahinabi sa Superbalita Cebu, nagkanayon nga sila si Porlacen ug Gimena nagdalig tawag sa mga rescuer ug kapulisan.
Ang bata daling gidala sa Barili District Hospital ug maayo na ang kahimtang ubos sa pag-abag sa Department of Social Welfare and Development (DSWD) sa lungsod.
Sumala pa ni Fat nga dunay nakuha ang close circuit television (CCTV) camera sa babaye nga nagbilin sa maong bata.
Apan ang kuha lubog hinungdan nga wa mailhi ang maong babaye.
Sa pagkakaron, ang ilang intelligence units ug imbestigador nangitag dugang kopya sa mga CCTV footage gikan sa ubang mga establisemento.
"Wa pa gyud namo masubay, Sir, kinsa ning inahana, kay diri lang sa Poblacion, daghang mga buntis. Among gisusi ang ubang barangay, gawas sa CCTV camera footage basin mailhan ni siya," dugang ni Fat.
Nagtuo sila nga taga diha lang sa dapit ang inahan, apan wala lang mabantayi sa iyang pagbilin. (GPL)