COTABATO CITY -- Patay na nga nakaplagan ang upat ka mga bata nga nalumos human gianod sa bul-og sa tubig sa dihang naligo sa sapa alas 2:30 sa hapon niadtong Dominggo.
Mga biktima pulos mga menor de edad nagpangedaron og 4 hangtud otso anyos ug mga molupyo sa Barangay Simuay, Sultan Kudarat, Maguindanao Province.
Matud ni SK Mayor Datu Shameem Mastura nga lima ka bata ang naligo sa Simuay River. Apan tungod sa kusog nga bul-og sa tubig gumikan nag-ulan, gianod ang mga nahisgutan paingon sa lawom nga bahin sa sapa.
Usa ang naluwas human nakalangoy paingon sa daplin sa sapa samtang ang upat hingpit nga gianod ug kalit nga nahanaw.
Sa gilusad nga search and rescue operation sa lokal nga panggamhanan, alas 5:00 sa hapon nakaplagan ang usa sa mga biktima nga nasangit ug wala nay kinabuhi.
Pagka-alas 8:30 sa gabii, nakaplagan sab ang tulo nga naglutaw-lutaw sa sapa ug wala na say kinabuhi.
Nagpasidaan si Mastura sa mga ginikanan nga bantayan og maayo ang ilang mga anak ug dili pasagdan aron nga di matumpawak sa kalautan. (Edgar E. Fuerzas)