GAWAS sa pagkuha og mga magduduwa, ang Gilas Pilipinas nagproblema sab sa pagporma sa ilang coaching staff alang sa ilang kampanya sa 2nd window sa 2021 Fiba Asia Cup qualifiers nga ipahigayon karong Nobiyembre ning tuiga.
Si Mark Dickel, kinsa maoy interim coach sa Gilas sa 1st window sa qualifiers, gituohang dili makagiya sa national team gumikan kay nahilakip man kini sa mga sakop sa TNT Tropang Giga nga mokombati sa Philippine Basketball Association (PBA) bubble nga sugdan karong Oktubre 11, 2020 sa Clark Freeport Zone sa Pampanga.
Usa ka aktibong consultant si Dickel sa Tropang Giga ug gikinahanglan siyang makigtambayayong og maayo kang coach Bong Ravena alang sa tinguha sa team nga makalabni’g balik og Philippine Cup title.
Hasta ang assistant coaches sa Gilas nga ningtabang kang Dickel sa 1st window niadtong Pebrero, 2020 nga sila si Topex Robinson ug Sandy Arespacochaga dili sab makatabang sa national team sa 2nd window.
Si Robinson napiling interim coach sa Phoenix Super LPG isip hulip ni Louie Alas, kinsa gitangtang sa team ning bag-uhay lang.
Sa iyang bahin, si Arespacochaga napili sab nga assistant coach ni Yeng Guiao sa NLEX Road Warriors.
Bugtong si Alex Compton lang ang mahabilin sa coaching staff sa Gilas Pilipinas gumikan kay mipirma man kini og kontrata isip full-time assistant coach. (ESL)