ANG produkto sa University of Cebu (UC) Webmasters ug basketball great nga si Dondon Hontiveros nagsugod sa iyang karera dinhi sa Sugbo ug nahimong usa sa mga pundasyon sa Cebu Gems sa nabungkag nga Metropolitan Basketball Association (MBA).
Likod sa kasayuran sa kadaghanan, hapit diay molarga si Hontiveros sa Manila human siya ni-graduate sa high school sa Don Bosco Technical College (DBTC) aron mo-try out unta sa college varsity team.
Wala nadayon ang paglarga ni Hontiveros sa Manila gumikan kay naangol siya atol sa usa ka exhibition game.
Matod ni Hontiveros, pagkahuman niya og high school naa siyay kaila nga ball boy sa Alaska Aces nga si Jun Tabanas, kinsa misugyot kaniya nga mo-try out sa Mapua College.
Ang pagkaangol ni Hontiveros maoy nagsible niyang taytayan aron makaduwa sa Webmasters hangtod nga nasulod siya sa Gems niadtong 1998.
“Yun nga kung hindi ako na-injured nag-try out na ako sa Mapua or University of Sto Tomas,” saysay ni Hontiveros sa interbiyu sa MVPSF Youth League-Cebu Facebook page .
“Si ball boy Jun Tabanas nagsabi sa akin na kilala daw niya si coach Joel Banal and coach Aric del Rosario.”
Mas niyanog ang pangalan ni Hontiveros sa MBA diin apil siya sa makasaysayong panagribal sa Cebu ug Manila Metro Stars nga gibituonan nila ni Alex Compton ug Rommel Adducul.
Mainiton sab ang panagribal sa Gems ug Negros Slashers nga gipangulohan nila ni John Ferriols ug Reynel Hugnatan.
Si Hontiveros wala mosikat sa iyang high school varsity years sa DBTC. Ingon niya nga sa dihang nag-fourth year high school na siya nagamit.
Sa iyang paningkamot, naabot ni Hontiveros ang iyang pangandoy nga makaduwa sa Philippine Basketball Association (PBA).
“Wala ko madayon sa Manila, ni-eskwela ko sa USJ-R (University of San Jose Recoletos) for one year then I got a call from UC coach to try out, tanggap na ako nuon for formality nalang ang lineup,” ingon ni Hontiveros.
Human sa iyang impresibo nga MBA career, nasulod si Hontiveros sa Tanduay Rhum Masters isip direct hire sa team. Nabaligya ang Tanduay franchise ug si Hontiveros nabalhin sa San Miguel Beermen diin siya miduwa og hapit usa ka dekada sa team.
Nakaduwa pud si Hontiveros sa Alaska Aces, Air21 Express, Petron Blaze Boosters ug San Migue Alab Pilipinas sa Asian Basketball League (ABL).
Usa sa pinakanindot niya nga nakab-ot mao nag pagrepresentra sa nasod isip miyembro sa national team.
Human sa iyang pagretiro niadtong 2017, si Hontiveros napili isip numero unong konsehal sa South District dakbayan sa Sugbo.