ANIAY maayong balita sa mga closed contact sa 22 ka mga boatmen sa dakbayan sa Lapu-Lapu nga nagpositibo sa coronavirus disease (Covid-19) sa miaging semana.
Ang 90 ka mga closed contact nila pulos negatibo sa swab test sa kagamhanan.
Mao kini ang gipahibawo ni Grace Mary Carungay, City Epidemiology and Surveillance Officer sa dakbayan.
Gawas sa mga closed contact, natapos na usab sa pag swab ang City Health Office sa tanang mga boatmen sa dakbayan.
Sa kinatibuk-an, moabot sa 1,191 ka mga boatmen ang gipaubos sa swab test sa Kagamhanan sa Dakbayan nga nagagikan sa Isla sa Olango, Punta Engaño, Marigondon, Maribago, Mactan ug Agus.
Matod ni Carungay nga karon nga wa nay nadugang sa nagpositibo nga boatmen, hayan gilihok na sa kagamhanan ang paghatag kanila sa mga Identification (ID) card nga magpamatuod nga sila Covid-free ug mahimo nga makadawat og mga turista.
Ang 22 kasamtangang gipahimutang sa isolation facility sa kagamhanan ug ang uban anaa sa Sta. Rosa Hospital sa isla sa Olango.
“Wala nay madugang pa ato nga mga nag positive kay zero na man ang ubang barangay. So, makaingon ta okay na and nasubay na nato tanan,” matod ni Carungay.
Si Lapu-Lapu City Mayor Junard “Ahong” Chan bag-o lang niluwat og executive order alang sa pag-umol og Lapu-Lapu City Balik Turismo Task Force aron masigurong adunay mag monitor sa tanang hotel,resorts ug boatmen alang sa nagkadaiyang mga tourism activities.
Gilangkuban kini ni Chan, Lapu-Lapu City Tourism Cultural and Historical Affairs Commission (TCHAC), Department of Tourism (DOT), kapulisan ug uban pang mga ahensya sa gobyerno aron masigurong masunod ang mga lagda ug health protocol nga ipatuman sa pagdawat sa kagamhanan ug mga turista. (GCM)