NIPALAG ang oposisyon sa Cebu City Council kalabot sa daling pag-aprobar sa aplikasyon sa mga telecom company alang sa pagtukod sa lima ka mga cell tower sa Dakbayan sa Sugbo. Ang giaprobahan mao ang sa Dito ug Globe samtang sa Smart pending pa kay dunay kuwang.
Ang daling pag-aprobar maoy pagtuman sa memorandum sa Department of the Interior and Local Government (DILG) nga nagpadali sa pag-aprobar sa aplikasyon sa mga telecommunications company alang sa pagtukod og cell tower.
Sa iyang State of the Nation Address (Sona), si Presidente Rodrigo Duterte nihulga sa mga telco sa pagpalambo sa ilang serbisyo kay kon di, iya kining pasirhan. Gihatagan niya og hangtod sa Disyembre ang mga telco.
Ang mga telco, sa ilang tubag sa hagit sa Presidente, nipasabot nga ang kalangay sa pag-aprobar sa ilang mga aplikasyon sa pagtukod og cell towers ang hinungdan. Tungod niini, ang DILG ug anti red tape body nihimo og mga lakang.
Usa ini mao ang pagpamubo sa proseso, gikan sa 200 ka mga dokumento, gihimo na lang kini nga 16. Wa na sab kinahanglana pa ang public hearing sa mga dapit diin tukoron ang mga cell tower.
Apan dunay punto si Konsehal Eugenio Gabura Jr. nga kay duna may ordinansa ang siyudad, kinahanglan kining tumanon, gawas kon wagtangon kini. Kay ang memorandum sa DILG way gahom batok sa usa ka ordinansa basta wa lang kini makalapas sa usa ka nasudnong balaud ug Konstitusyon.
Aron di magsungi ang ordinansa ug memorandum sa DILG, mas maayong dunay mohimo og lakang sa paglibkas sa ordinansa aron di kini mahimong legal nga babag sa umaabot. Kay ang ordinansa usa man ka balaud sa lokal nga kagamhanan, di kini mahimong matumban sa labing kasayon bisan kon wa pa kini mahasubay sa tinguha sa Presidente. Timan-i baya, way bisan usa ka linalang nga mahimong labaw sa balaud.