ANG pagkanta-kanta maoy usa ka pamaagi sa pag-lingaw-lingaw sa atong kaugalingon, bisan kon dili kita maayo mokanta. Pawala sa stress bisan kon anha lang kita mokanta sulod sa comfort room panahon nga maligo ta. Labi pa gyud kitang malingaw kon anha ta mokanta sa karaokihan unya naay motan-aw nato o audience dayon mopakpak inig human og kanta unya modayig nga nindot kaayo tag tingog. Bisan yabag god.
Ang karaokehan dili gyud mawala bisan asa. Naa sulod sa balay, gawas sa balay, daplin sa kalsada ug mga tindahan sa ilumnon nga makahubog ug sa mga merkado. Naa say pormal nga lugar sulod sa air-conditioned room nga maayo ang sound proof. Naa pay guest relations nga mga babaye nga puwedeng gunit-gunitan.
Apan gumikan kay saba lagi kining karaoke labi pa sa panahon sa kagabhi-on kon naa sa gawas, gusto sa Associated Labor Union-Trade Union Congress of the Philippines (Alu-TUCP) nga i-ban kini panahon sa weekdays o gikan sa Lunes hangtod sa Biyernes sa gabii. Sa tumong nga dili ma-disturbo ang mga tinun-an nga nag-on line classes na karon ug mga trabahante nga nag-work from home.
Dili makatulog ang uban ug dako kinig epekto sa productivity sa mga empliyado. Dili makatuon pag-ayo ang mga estudyante. Tinuod bitaw uy, kay ako mismo dili makatulog kon naay magsaba-saba. Kusog ug bunal kaayo nang mga sound system nga gigamit karon sa mga karaokihan.
Samtang atong katungod ang paglingaw-lingaw, apan kinahanglan usab nga atong tahuron ug respituhan ang ubang mga dunggan nga wa makabati sa mananoy kon dili ang langgis ug sintunadong pag-kanta nato sa ‘My Way’.
Ilabi na gyud ning panahon sa pandemya.
Lisud ang pag-awit sa kalipay nga daghan ang nagbangutan sa atong palibot. Respituhay lang ta. (bobbygnalzaro@gmail.com)