IHANGAD na lang sa langit kining mga tawo nga magsigi og ingon nga di tinuod ang Covid-19 pandemic. Ang balita karon kay moabot na og 1 ka milyon ang kinabuhi nga nangakalas sa tibuok kalibutan tungod niining maong sakit.
Unya ra ba, ang labing abanteng nasud sa kalibutan, ang Estados Unidos, maoy labing daghan sa nangamatay. Mga 200,000 na.
Apan, bisan og dugay pa ang gidali nga mga bakuna, naa sab gyuy mga nasud nga malampuson sa pagpapabiling ubos ang nangatakdan sa ilang nasud. Pananglitan, ubos kaayo ang mga nasakit og Covid-19 sa Vietnam ug Taiwan.
Mas maayo tingale tun-an nato unsay sakto nilang gibuhat gawas sa paghulat na lang sa pag-abot sa bakuna.
Pilipinas
Dinhi sa Pilipinas, moabot na og 5,344 ka tawo ang nangamatay. Ang nangasakit moabot na og 304,226.
Ingon niini ka grabi ang pandemya dinhi sa Pilipinas. Apan ang atong liderato kutob na lang sa paghulat inig abot sa bakuna.
Mabalaka ko kay daw kontento na si Presidente Rodrigo Roa Duterte sa iyang nabuhat. Mas nagdaghan karon ang iyang paghimaraut kang Bise Presidente Leni Robredo.
Apan, bisan sa kagamay sa budget sa opisina ni Robredo, mas daghan na siya og nahimo batok sa Covid-19. Kada panaway ni Duterte, mas maklaro na hinuon nga wa siyay nahimo.
Imbes tarong ang iyang mga komentaryo, igo na lang hinuong moingon nga ang gasolina mahimong ipanghunaw. Ug magbisbis og pesticide gikan sa ayroplano. Mao ba kiniy isulti og tarong nga presidente?
Alang kaniya, ang mosaway sa iyang way nahimo mao hinuon ang nagpasamot sa kahimtang sa nasud.
Rehiyon 7
Makadasig hinuon ang mga balita dinhi sa Rehiyon 7 kay daw napaubos nato ang mga aktibong insidente sa Covid-19 sa 1,700 ka kaso sa miaging Dominggo.
Bantayanan lang gyud nga di na mosaka pagbalik pa gyud. Niabot na gud og 1,400 ka aktibong kaso unta. Apan nisaka na sab.
Ang nagdala og bida sa kadaghanon mao gihapon ang Sugbo. Apan di na ang Syudad sa Sugbo. Mag-amping lang gyud kay di baya kakumpyasahan ang SARS-Cov-2. Naa pa gihapon kini.
Naay 600 ka kaso sa lalawigan sa Sugbo, 398 sa Syudad sa Sugbo, 255 sa Syudad sa Lapu-Lapu, ug 213 sa Mandaue.
Ang ato lang kay angay untang dunay komprehensibong plano ang kagamhanan sama sa nahitabo sa Vietnam ug sa Taiwan. (@anol_cebu sa Twitter)