GIILA sa kapulisan nga drug lord ug kanhi kapitan sa Barangay Lugo, lungsod sa Borbon, amihanan sa lalawigan sa Sugbo nga si Jennifer Mercader, napatay atol sa engkwentro tali sa kapulisan sa Negros Occidental kagahapon sa buntag, Septiyembre 28, 2020.
Si Mercader, naila usab nga notadong hitman, nipuga gikan sa Medellin District Jail sa lungsod sa Medellin. Sugbo kapin sa usa ka tuig na ang nakalabay ug didto nagtagotago sa isla sa Negros.
Matod ni Police Brigadier General Albert Ignatius Ferro. direktor sa Police Regional Office (PRO) 7, si Mercader nakuhaan pa sa iyang posisyon og walo ka putos sa gituohang shabu nga mobalor og P472,000 suba sa Dangerous Drugs Board (DDB) value, usa ka 45 kalibre nga armas ug usa ka shot gun.
“Naay nahitabo nga armed confrontation and as a result he died while the pursuing police was just protecting themselves,” matod ni Ferro.
Niadtong Marso 5, 2019, nakaikyas si Mercader sa Medellin District Jail.
Nabilanggo siya tungod sa kalambigitan niini sa ilegal nga drugas.
Miangkon usab kini nga usa siya ka hitman ug gani adunay mga sakop sa PNP ang mogamit kaniya kaniadto sa ilang operasyon.
Human siya miiskapo, didto na siya mitago sa Barangay Minoyan, lungsod sa Murcia sa Negros Occidental apan nagpadayon sa iyang ilegal nga kalihukan sama sa pagpamaligya sa ilegal nga drugas.
Adunay naka hatag og impormasyon sa kapulisan sa dakbayan sa Bacolod nga maoy hinungdan nga gilusad dayon ang operasyon uban ang Regional Intelligence Division (RID) sa Police Regional Office (PRO) 6 sa pakig-alayon sa PNP Central Visayas.
“Nag-hibernate siya outside Region 7 but you know the long hand of the law will surely reach you if you are a criminal. That’s the only time that justice will be served if you will be able to arrest them, or like that the unfortunate incident that there was a shootout. That’s in effect is the job of the law enforcer to work hard like arrest, re-arrest or arrest those criminals,” dugang ni Ferro sa Superbalita Cebu.
Aduna pay daghang mga pending warrant of arrests si Mercader sa mga kaso nga gilamabigitan niini apan tungod sa iyang kamatayon, matod ni Ferro, nga mahimong masulbad na ang mga kaso nga iyang giatubang.