ANG Cebu City Government mosugod sa pag-test batok sa coronavirus disease 2019 (Covid-19) sa gibanabanang 2,000 ka mga mamaligyaay sa Carbon Market Complex sugod karong Septiyembre 30 hangtod sa Oktubre 2, 2020.
Kini ang gipahibawo ni Konsehal Joel Garganera, deputy chief implementer sa Emergency Operation Center (EOC) para mahibaw-an ang sitwasyon sa maong virus sa labing dako nga merkado sa Sugbo.
Matod ni Garganera, mogamit sila sa rapid diagnostic test (RDT) ug polymerase chain reaction (PCR) test nga magsugod alas 8:00 sa buntag hangtod alas 3:00 sa hapon sa parking area sa Carbon Market sanglit mao kini ang pabor nga lugar para sa mga mamaligyaay.
Ang chairman sa Cebu Market Vendors Development Cooperative (Cemvedco) nga si Erwin Gok-ong Sr., kinsa adunay 1,800 ka mga miyembro, nihangop sa lakang sa City Hall.
“Ang gobyerno adunay gahom nga mohimo og Covid test ug isip usa sab ka vendor dili ta makabalibad ana kay para raman ni sa atong kaayohan kay para mahibaw-an kon si kinsa ang adunay virus ug masumpo dayon kini sa atong mga awtoridad aron dili na makatakod pa sa lain,” padayag ni Gok-ong.
Ang pangulo sa Cemvedco nipasupot sa iyang pangutana pananglit adunay mapositibo sa mamaligyaay o naninda ug kon unsay sunod nga buhaton sa EOC?
Si Garganera, sa iyang bahin, nagkanayon nga kon magpositibo ang usa ka vendor, ipaubos kini sa quarantine ug kon dili mohaom ang iyang pinuy-anan sa gi-require sa Inter Agency Task Force, adunay Noah complex nga mahimo nilang istaran samtang nagpaalim sa sakit.
Ang naninda sa Unit-1 maoy unahon sa pag-test sa Septiyembre 30, ang Unit-2 ug Unit 3 sa Oktubre 1 ug sa Oktubre 2 ang vendors gikan sa Freedom Park, Warwick Barracks ug mga ambulant vendor.
Ang konsehal nga maoy gitahasan ni Labella sa pagpangulo niining gubat batok sa Covid-19 nagkanayon nga libre ang Covid-19 test para sa 2,000 ka vendors ug dili na kinahanglan nga isirado ang tindahan sanglit hamubo ra ang proseso.
Si Garganera nagkanayon nga angay masayran sa EOC ang sitwasyon sa Carbon sanglit base sa ilang pagtuon, kusog ang transmisyon sa virus sa merkado sanglit ilang nakita nga dikitdikit ang mga tawo nga mangompra sa merkado matag adlaw.
Ang stall nga gipanag-iya sa nagpositibo nga vendor isirado lakip na ang mga kasikbit para sa disinfection ug ilusad dayon ang subsob nga contact tracing. (PAC)