ANDAM na ang Department of Education (DepEd) sa pagpahigayon og klase sa 80 ka mga barangay sa dakbayan sa Sugbo sugod sa Oktubre 5, 2020.
Si Cebu City Schools Superintendent Rhea Mar Angtud nagkanayon nga adunay tulo ka eskema nga ilang gipatuman para malikay ang mga tinun-an sa Covid-19.
“Ready na gud ta para sa klase karong Oktubre 5. Mao nay atong giingon nga as far the anticipated problem andam nata sa pagtubag ug paghatag sa solusyon pero wa pata mahibawo kon unsa pay problema nga moabot nga wala nato damha and hopefully walay mogawas nga laing problema,” padayag ni Angtud.
Ang kapin o kulang 170,000 ka mga tinun-an sa kindergarten, elementary ug high school moeskwela para sa school r year (SY) 2020-2021 pinaagi sa modules, virtual online ug offline.
Matod ni Angtud, preparado na ang DepEd Cebu City ug aduna sab silay mga pagpandam nga gibuhat pananglit adunay mga problema nga motumaw nga ilanm nang nakita sa wala pa magsugod ang klase.
Gitug-an sa pangulo sa DepEd Cebu City nga ang kindergarten hangtod sa grade 3, gihatahan silang tanan og modules para sa tanan nilang subject diin ang magtutudlo mokuha sa cellphone number sa ginikanan para kon adunay mga pangutana dali ra kining matubag.
Ang grade 4 hangtod sa grade 12, mopili sila sa virtual online, offline class o modular apan gihulagway ni Angtud nga daghan ang nipa-enroll sa virtual class.
Sa offline class, ang ginikanan maoy moadto sa hotspot area sa ilang eskwelahan para i-download ang mga topic sa ilang klase ug dad-on didto sa ilang balay para tun-an sa mga estudyante.
Ang DepEd Cebu City nipahigayon og dry run sa ilang mga eskema ug masayran ang resulta ning semanaha. (PAC)