ARON mamenosan ang gidaghanon sa mga piniriso sulod sa mga prisohan, giduso ni Kongresista ug Deputy Speaker Pablo John Garcia ang House Bill No. 7703.
Ang balaudnon mopahimutang sa national monitoring system sa mga piniriso kun persons deprived of liberty (PDL) aron maluagan ang mga prisohan sa nasod.
Ubos sa balaudnon, ang digital network magtipig sa mga impormasyon sa mga PDL, lakip na sa arrest warrants, kasamtangan nga kaso ingon man ang gidugayon sa ilang pagkabilanggo.
Mahimo nga maka access ang Department of Justice (DOJ), Bureau of Jail Management and Penology (BJMP), Bureau of Corrections (BuCor), Board of Pardons and Parole ug Parole and Probation Administration.
Subay niini, mas dali na lang ang pag-update sa impormasyon sa matag piniriso ug pagsusi kon eligible ba alang sa parole, probation o ang pagbuhi na niini aron kalikayan ang pagtipun-og sa mga piniriso sa prisohan sa nasud.
Base sa datos sa BJMP sa 2018, niabot na sa 582.37% ang congestion rate sa mga detention centers, diin misobra na og 120,000 ka mga PDL sa usa lang ka pasilidad.
Gikataho nga dul-an sa usa ka libo na usab sa mga PDL nga naghinangat na sa pagka 60-anyos.
“Our criminal justice system must be compassionate and ensure the proper reintegration of rehabilitated persons into society. Lives must be redeemed to pursue their social and economic potential—lives must be empowered so that all Filipinos may attain a law-abiding and fulfilling existence,” matod ni Garcia.
Usa sa dakong hagit sa kagamhanan ning panahon sa coronavirus disease pandemic mao ang pagpahigayon og physical distancing sa mga piniriso.
Sa Sugbo, nalakip ang BJMP ug Cebu Provincial Detention and Rehabilitation Center (CPDRC) nga nakatala og mga piniriso nga nataptan sa Covid-19 apan naka-recover na.
Hinungdan nga mihimo usab og lakang si Cebu Governor Gwendolyn Garcia pinaagi sa pagluwat sa Executive Order No. 15 nga naglatid sa mga giya nga subayon alang sa pag release sa mga piniriso.
Subay sa jail decongestion guidelines sa 2014, gitugutan na nga makalingkawas ang mga PDL nga naka serve na sa minimum nga penalty ug kadtong na-dismissed na ang kaso.
Sa 2019, niabot sa 2,040 ang gidaghanon sa mga inmate sa CPDRC apan sa uwahing datos anaa nalang sa 1,700 ka mga PDL.
Gawas sa mga prisohan sa nasud, mipadayag usab og suporta si Kongresista Garcia sa pagbalhin sa mga piniriso sa provincial jails ngadto sa mga bilanggoang gidumala sa BJMP.
“Provincial jails are a huge drain on the resources of provinces. Transferring them to the BJMP would not only ease this burden, but would facilitate the monitoring system for inmates and PDLs,” matod ni Garcia. (ANV)