COTABATO CITY -- Gipalig-on pa sa Joint-Task Force Central sa militar ang paglutos sa mga terorista sa probinsya sa Maguindanao.
Sa taho gikan sa 601st Brigade sa Philippine Army nga misaka na sa 13 ang patay sa mga miyembro sa Bangsamoro Islamic Freedom Fighters (BIFF) ug duha sa militar sa usa ka semana nga focused military operation sa Maguindanao.
Upat na sab ka kampo sa Dawlah Islamiya Terror Group sa BIFF ang nailog sa mga sundalo apil na ang duha ka pabrika sa mga bomba.
Nakasentro karon ang operasyon sa militar sa bukiron nga parte utlanan sa Shariff Aguak, Datu Hoffer ug Ampatuan Maguindanao.
Target sa focused military operation ang pundok ni Salahudin Hassan nga dunay kauban nga mga langyaw nga terorista.
Gawas sa grupo ni Hassan, gilutos sab sa Joint Task Force Central ang pundok ni Shiek Esmail Abdulmalik alyas Kumander Abu Toraife sa BIFF-ISIS Inspired Group.
Midaghan og samot ang mga sibilyan nga namakwit sa mga apektadong dapit sa kahadlok nga maipit sa kagubot.
Sa kasamtangan dunay mga dapit na nga gipunting ang militar sa positibo nga gitaguan ni Kumander Hassan ug Toraife. (Edgar Fuerzas)