DAVAO DE ORO -- Tingkagol sa prisohan ang 45 anyos nga lalaki human gipusil ang iyang bayaw nga pastor didto sa Purok Malipayon, Sitio Buladan, Barangay Katipunan, Maragusan alas 12:30 sa udto niadtong Lunes, Septyembre 28.
Biktima mao si Lorenzo Lemindog Landanganon, 65 anyos, minyo, pastor sa Faith Tabernacle Church ug molupyo sa Purok Lawaan-B, Barangay Poblacion sa nahisgutang lungsod.
Base sa inisyal nga imbestigasyon, nagkalalis ang biktima ngadto sa iyang bayaw nga si Jay Basicong Dagsuan, 45 anyos, minyo, taga Purok Malipayon, Sitio Buladan sa nahisgutang barangay.
Sumala pa nga samtang naglalis, dali matud pang miuli ang suspek sa ilang balay ug sa pagbalik bitbit na niini ang improvised shotgun ug dayong pusil sa biktima nga naigo sa tuong bukton.
Gidali sa pagdala sa mga silingan ang pastor ngadto sa Davao De Oro Provincial Hospital-Maragusan apan gibalhin gilayon ngadto sa Davao De Oro Provincial Hospital-Montevista.
Misibat ang suspek apan wala madugay, nadakpan siya sa mga pulis didto sa iyang balay.
Nakuha gikan sa posisyon sa suspek ang usa ka yunit nga improvised shotgun nga kargado og usa ka basiyo sa bala ug duha ka buhing mga bala.