GIHANGOP sa lokal nga panggamhanan sa siyudad sa Davao ang gipakanaug nga hukom batok sa mga akusado sa pagpamomba sa Roxas Night Market niadtong Septyembre 2, 2016 nga miresulta sa kamatayon sa 17 ka mga tawo ug pagkaangol sab sa daghan pang uban.
Ang hukom, gipakanaug niadtong Lunes, Septyembre 28, 2020, ni Judge Marivic Vitor sa Regional Trial Court Branch 266 sa Taguig, nihatag og hustisya ngadto sa mga nangamatay sa pagpamomba, mga naluwas, ilang mga mahal sa kinabuhi, ang tibuok siyudad sa Davao ug sa tanang Dabawenyos kinsa nag-antus sa linugdangan sa maong hitabo.
Kini human nga nahukman nga sad-an sa kasong Multiple Murder and Multiple Attempted Murder sila TJ Tagabaya Macabalang alyas Abu Tufael; Wendel Apostol Facturan alyas Muraimin, Mohaimen; Musali Urbano Mustapha alyas Mus, Abu Hurayra; Jessy Vincent Guinto Original alyas Aisha; Zack Haron Lopez; ug Jackson Mangulamas Usi alyas Abu Hamsa.
Samtang nahukman sab nga sad-an sa kasong terrorism ubos sa Section 3 (f) sa Republic Act 9372 sila si TJ Tagabaya Macabalang alyas Abu Tufael; Wendel Apostol Facturan alyas Muraimin, Mohaimen; Musali Urbano Mustapha alyas Mus, Abu Hurayra; Jessy Vincent Guinto Original alyas Aisha; Zack haron Lopez, Jackson Mangulamas Usi alyas Abu Mansur, Jam; Ausa Abdullah Mamasapano alyas Abu Hamsa.
Nagpasalamat ang lokal nga panggamhanan sa siyudad ngadto sa mga surbaybor ug mga pamilya sa mga nangamatay sa pagpursige sa kaso batok sa mga akusado bisan pa sa daghang mga hagit.
Samtang nagpahimangno ang lokal nga panggamhanan nga bisan og naangkon na ang kadaugan, di pa gihapon angay nga lugakan ang pagbantay. Ang nasinati nga terorismo sa siyudad mas moduot pa kanatong tanan aron hangpon ang "culture of security." (Wenz G. Mendoza)