Dear Atty. Joan,
Maayong adlaw, Atty. Joan, ug sa tanang tigsunod sa inyong lindog.
Duna koy itampo sa inyong lindog kaong semanaha. Kabahin kini sa nasinati sa akong pag-umangkon nga nagpangedaron og 17 anyos.
Ang akong pag-umangkon usa ka hitsuraan nga dalaga. Iyang gisugilon kanako nga dunay naghimo og fake account kon diin gi-post ang iyang mga hulagway sa usa ka dating app nga Tinder.
Matod pa sa akong pag-umangkon, duna’y naggamit sa iyang mga hulagway sa maong dating app. Pinaagi sa mga screenshots nga gi-send kaniya, nakita sa akong pag-umangkon nga nagsend ang maong account og mga ngil-ad nga hulagway sama nalang sa mga nude photos nga gani dili iyaha.
Nasayod ko nga ang akong pag-umangkon usa ka menor de edad nga gipanalipdan sa balaod. Mao nga ako siyang gitambagan nga ipa-blotter ang maong hitabo. Duna na’y police blotter entry ang maong hitabo.
Na-report na sab ang sa National Bureau of Investigation (NBI) apan miingon ang maong ahensya nga kinahanglan og eksperto sa information technology (IT) expert sa maong tao nga mihimo sa fake account.
Unsa kahay angay buhaton sa maong sitwasyon? Medyo naproblema gyod ang akong pag-umangkon tungod kay magtuo ang iyang mga kaila nga siya mao ang nagdala sa maong account.
Daghang salamat sa imong umaabot nga tambag. Akong panghinaot nga mahatagan og kasulbaran ang gi-atubang sa akong pag-umangkon.
Imong magtatampo,
Mary Grace
Dear Mary Grace,
Una sa tanan maayong adlaw usab kanimo diha Mary Grace ug salamat sa imong pagsunod niining lindog. Usa ka nga ehemplo sa pagpakabana labaw na nga dili ikaw ang biktima sa maong insidente.
Ang nahitabo sa imong pag-umangkon usa ka kalapasan ubos sa Anti-Cybercrime Law. Matawag kini nga computer-related identitiy theft ug mahimong mapanubag ang sad-an sa maong kalapasan.
Tungod kay napahibalo na ang mga hingtungdang ahensya sa maong hitabo, mahimo kining gamiton isip ebidensya sa prosekusyon o piskaliya sa pagkiha batok sa mamumuo.
Mahimo sab nga isumbong ang maong insidente ngadto sa PNP Anti-Cybercrime Group. Ang maong opisina maoy gitahasan sa pagresulba sa mga matang nga dunay kalabutan sa cybercrime.
Mahimong mangayo ang kapolisan og search warrant kon mahibaw-an kon kinsa ang nagpaluyo sa maong fake account. Posibleng susihon sab ang imong mga kahimanan sama sa cellphone aron masuta ang nakasala sa imong pag-umangon, mabisita nimo ang ilang opisina didto sa Sudlon, Barangay Lahug, Cebu City.
Dugang tambag mao ang pagpasaka og kaso subay sa kalapasan sa Republic Act No. 9775 or ang Anti-Child Pornography Act of 2009 kon mailhan na ang suspetsado sa maong kalapasan.
Makonsiderar nga bata ang imong pag-umangkon tungod kay ubos pa kini sa dise otso (18) anyos pagkahitabo sa pagkalat og law-ay nga hulagway pinaagi sa maong dating application.
Daghang salamat Mary Grace sa imong sulat tampo ug hinaot nakatubag ang among tambag sa iyong suliran.
Imong alagad,
Atty. Joan
[Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa among Facebook page nga “Children’s Legal Bureau” m.me/ChildrensLegalBureauInc (Messenger)]