ILIBKAS na sa Philippine Basketball Association (PBA) ang ilang gipahamtang nga indefinite suspension ngadto kang Calvin Abueva sa dili pa magsugod ang PBA bubble karong Oktubre 11, 2020 sa Clark, Pampanga.
Mao kini ang gibutyag sa usa ka kasaligang tinubdan sa interbyu sa Spin.ph human naghugpong ang pambato sa Phoenix LPG Fuel Masters kang Commissioner Willie Marcial kagahapon.
Ang delegasyon sa Fuel Masters ninglarga na paingon sa Clark niadtong Lunes apan wala si Abueva gumikan kay gitangtang man kini sa ilang 25-man lineup gumikan sa suspensyon niini.
Hinuon sa higayon nga mahimo nang pinal ang paglibkas sa suspensyon ni Abueva, hayan palargahon dayon kini paingon sa Clark aron makaapil sa preparasyon sa Fuel Masters.
Human sa iyang pagpakighugpong kang Abueva, si Marcial mihangyo og pagsabot gikan sa basketball fans nga ningsempatiya sa gitawag og The Beast.
Matod ni Marcial nga ang tanan niyang gibuhat alang sa kaayuhan ni Abueva ug mismong sa liga.
“Katulad ng sinabi ko, eto po ay sa kabutihan ni Calvin, sa kabutihan ng PBA, at sa kabutihan ng lahat, etong ginagawa namin,” batbat ni Marcial.
“Kung nagagalit po kayo sa akin, pasensya muna po. Eto po ay sa kabutihan ng lahat.”
Gawas sa pagpakighugpong kang Marcial, si Abueva nitunga sab sa opisina sa Games and Amusement Board (GAB) aron kuhaon ang bag-o niyang playing license, usa ka dakong senyales alang sa iyang pagbalik.
Ang suspensyon ni Abueva milanat na og 15 ka mga buwan.
Napahamtangan og silot si Abueva gumikan sa iyang paghampak sa import sa TnT KaTropa nga si Terrence Jone ug pagpakig-away sa uyab ni Bobby Parks Jr. kaniadto. (ESL)