GITUBAG ni Japanese “Monster” Naoya Inoue ang mahait nga mga pulong nga gibuhian ni Filipino world champion Johnriel Casimero ning bag-uhay lang.
Si Casimero nagpauwan og mga mahagiton ug makainsulto nga mga pulong ngadto kang Inoue human niya nadepensaan ang iyang World Boxing Organization (WBO) bantamweight title niadtong Dominggo (RP time) pinaagi sa makapaukyab nga 3rd round TKO nga kadaugan batok kang Ghanaian Duke Micah sa Cennecticut, USA.
Matod ni Casimero nga nahadlok kaniya si Inoue hinungdan nga dili kini angayang tawagon nga “Monster.”
“I’m the real monster. You’re no monster. You’re a Japanese turtle,” asoy pa ni Casimero sa post-fight conference nga napatik sa boxingscene.com.
“Naoya Inoue is scared of me. You’re next. I would have knocked out anyone today.”
Wala makautong si Inoue sa mahait nga mga pulong ni Casimero ug gitubag kini niya pinaagi sa pag-ingon nga dili siya maigo sa “walop” nga kumo sa lumad nga taga Ormoc City, Philippines.
“You won’t be able to hit me with such a big swing,” pamahayag ni Naoya nga napatik sa rappler.com.
Niadto ra untang Abril, 2020 nakatakdang magharong sila si Casimero ug Naoya sa usa ka unification bout diin isugal ni Casimero ang iyang WBO sa International Boxing Federation (IBF) ug World Boxing Assiciation (WBA) bantamweight titles ni Naoya.
Apan nauswag kini sa wala matino nga petsa gumikan sa pagkuyanap sa coronavirus disease 2019 (Covid-19).
Unya niabot ang adlaw nga nasayran na lang ni Casimero nga nakapili na og laing kontra si Naoya hinungdan nga nagtuo ang Pinoy nga nitalaw kini sa ilang away.
Hinuon nagtinguha si Casimero nga si Inoue maoy iyang makontra sa sunod niyang tahas.
Ang pagpakigbatok kang Inoue maoy damgo nga away ni Casimero.
Apan kon dili gihapon mahan-ay ang ilang away, gusto ni Casimero nga makig-away ni Mexican Luis Nery o Cuban Guillermo Rigondeaux alang sa sunod niyang tahas. (ESL)