MOPAHIGAYON ang Kagamhanan sa Dakbayan sa Lapu-Lapu og tourism fair sa Hoops Dome sa Brgy Gun-ob sa Oktubre 17.
Ang kalihukan maoy pormal nga paglusad sa programang Balik Turismo sa dakbayan.
Matod ni Lapu-Lapu City Mayor Junard “Ahong” Chan nga ang mga hotel ug resort sa dakbayan mosalmot, diin ilang ibaligya ang ilang mga produkto ug pagkaon sa ubos nga presyo.
Paagi kini aron ma promote ang nagkadaiyang hotel ug resorts sa dakbayan lakip na ang presyo sa ilang mga hotel accomodation unya ubos sa pagbukas sa turismo sa dakbayan.
Sa pagkakaron, gibutyag ni Chan nga anaa pa sa 70 porsyento sa mga hotel ug resort sa dakbayan ang nag operate.
“As I said, it is very low rates. Ubos gyud kaayo ni tanang hotel sa Lapu-Lapu kay sa atong feedback, minus pa kaayo mao nga maghimo ta og mga booth just to sell their hotel,” matod ni Chan.
Samtang gibutyag sa mayor nanghinaot siya nga paboran sa Department of the Interior and Local Governmemt (DILG) ang ilang hangyo nga tugotan nga maka check-in sa mga hotel ug resort uban ang ilang pamilya ang mga senior citizen ug menor de edad.
Nangayo og katin-awan si Chan kalabot sa lagda sa DILG mahitungod sa senior citizens ug menor de edad niining panahon sa modified general community quarantine (MGCQ) mahitungod sa tourism travel.
Giawhag usab sa mayor ang mga turista sa dakbayan nga likayan ang mga home stay gumikan kay maglisod ang kagamhanan sa maong paagi sa ilang contact tracing.
Mao usab kini ang hinungdan nga ang di taga Lapu-Lapu giawhag lang una sa pagkakaron nga di maligo sa mga pampublikong kabaybayonan sa dakbayan.
“Ang ato man gud ma monitor nato, ang hotel and resort already knew unsay protocol nga iparehistro gyud ang dili taga Lapu-Lapu nga mosud diri sa atoa. Sa kon ing-ana man gud, wala tay control. Mas siguro ta atong hotels ug resort kay ato na gipa undergo sila og swab test,” matod ni Chan.(GCM)