SUSPEK sa pagpatay sa usa ka pulis sa lungsod sa Minglanilla niadtong 2014 napatay sa mga pulis sa Dakbayan sa Butuan niadtong Septiyembre 23 human giingong nisukol dihang i-serve unta ang warrant of arrest kaniya.
Si Police Captain Arvin Hosmillo, hepe sa Minglanilla Police Station sa pakighinabi sa mga tigbalita, niingon nga ang napatay nga si Jeffrey Caparida, alyas Victor Uy, giadto sa mga pulis sa Barangay Basag, Dakbayan sa Butuan, apan giingong nisukol dihang nangabot ang kapulisan.
Si Caparida nag-atubang og kasong murder sa pagpatay kang PO2 Omar Parages ug giisyuhan og warrant of arrest sa korte.
Apan wa pa makaabot ang mga pulis nga gipangulohan ni Police Captain Jayeward Dularte sa balay nga gipuy-an ni Caparida, giunhan sila pagpusil ang grupo hinungdan nga nahitabo ang pinusilay nga niresulta sa pagkamatay sa suspek.
Si Caparida nakaangkon og mga samad sa lawas.
Dugang ni Homillio nga si Caparida anaa sa labing una sa ilang listahan sa mga wanted person tungod sa iyang pagpatay kang Parages sa Barangay Lipata, lungsod sa Minglanilla niadtong 2014.
Samtang gitumbok usab sa kapulisan si Caparida dihang dinhi pa sa Sugbo nalambigit sa ilegal nga drugas. (BBT)