PANG-ANTOS sa kuwang kaayong supply sa tubig sa mga lumolupyo sa tulo ka mga barangay sa Dakbayan sa Talisay maundang na human ang Metropolitan Cebu Water District (MCWD) nibutang og bomba sa Barangay Lawaan 3 sa mao nga dakbayan.
Ang atabay dunay kapasidad sa pag-supply sa 24 oras sa Barangay Lawaan 1, 2 ug 3 sud sa 24 oras nga tulo ka tuig nang nag-antos sa kakuwang sa supply sa tubig.
Si Henry Yee, general manager sa MCWD sa pakighinabi sa Superbalita Cebu, niingon nga tungod sa hangyo sa mga residente sa kabarangayan sa siyudad ingon man sa pag-abag ni Talisay City Mayor Gerald Anthony Gullas, ila kining gisanong.
Ang Barangay Lawaan 3 ang nauna sa ilang listahan, apan mobutang pa silag laing mga tinubdan sa laing mga barangay sa siyudad.
“Private area ning lugar maong atong gipalit gyud ni sa MCWD aron makabutang na gyud ta og bomba dinhing dapita ug makahatag ta og tubig. Kay tulo na ka tuig pud nila ning problemaha,” matod ni Yee.
Matod ni Yee, dunay gikusgon nga 40 cubic meter nga tubig matag oras nga mabuga ang bomba. Matag cubic meter tombas sa unom ka barel sa tubig.
Ang bomba sa tubig gisubhan sa Martes sa buntag, Septiyembre 29, 2020 pinaagi sa pagbendisyon ni Fr. Reynato Gamurot sa Our Lady of Sacred Heart Parish sa Capitol.
Gitambungan kini sa mga representante nila ni Gullas ug Bise Mayor Alan Bucao.
Isunod nila ang Barangay Lagtang ug San Isidro sa pagbutang og bomba.
Si Yee wa na hinuon nitug-an kon pila ang ilang kinatibuk-ang gasto sa proyekto.
Samtang si Lawaan 3 Barangay Captain Frederick Marababol, sa iyang habig, niingon nga dako ang ilang pasalamat kalabot sa pagmuntar sa bomba sa tubig sa ilang barangay.
Tungod kay taud-taud na usab kini nga usa mga nag unang problema sa ilang barangay.
Niining karon nga sila duna nay tubig, di na mag-antos ang mga tawo sa paghuwat sa agas kay 24 oras kining mohatag og supply. (BBT)