ANG Land Transportation Office (LTO) 7 miabli na sa ilang Drivers Education Center (DEC) nga gituyo og mugna alang sa mga kabos apan angay nga makabaton og lisensiya sa pagmaneho og sakyanan.
Si LTO 7 Director Victor Caindec nagkanayon nga siya nadasig sa pagmugna sa DEC gumikan sa Malasakit Center nga giumol ni Senador Bong Go kansang tumong mao ang pagtabang sa mga kabos nga masakiton.
Ang hepe sa Cebu City district office sa LTO 7, Joel Maloloy-on, nagkanayon nga mobayad og P300 ang estudyante sa DEC para sa tulo ka mga adlaw balor og 15 oras nga pagtuon aron makakuha sila og student permit.
Giklaro ni Maloloy-on nga adunay official receipt sa LTO ang gibayad nga kantidad nga ilang gamiton pagpamalit sa reading ug activity materials sulod sa tulo ka adlaw nilang pag-eskwela para matudloan sila sa hustong pamaagi ug balaod sa trapiko sa ilang pagmaneho kon aduna na silay regular driver’s license.
Ang tumong sa istrikto nga pagkuha sa lisensiya sa pagmaneho ug pagpaubos sa mga aplikante nga mo-enroll labi na sa mga private driving school gitumong alang sa kaluwasan sa tanan sa karsada.
“Ang tuyo gud sa atoang gobyerno nga ma-institutionalize ang pag-isyu og lisensiya sa atoang mga aplikante because we want a better and safer roads,” padayag ni Maloloy-on.
“Gusto nato sa LTO nga maka-isyu ta og lisensya ngadto sa competent and qualified drivers kay this is a new program sa DOTr nga gipatuman tungod kay nakita nato nga in the past, dili systematic and institutionalize ang paghatag og lisensiya,” dugang sa hepe sa Cebu City district office.
Gipasabot ni Maloloy-on nga kini maoy maghatag og solusyon sa problema sa karsada sama sa disgrasya nga nikutlo og mga kinabuhi sanglit pulos na disiplinado ang mga driver.
Ang LTO 7 adunay akreditado ug well-trained nga instructors ubos sa pagpangulo ni Paul Machacon.
Ang maka-apply nagkinahanglan og endorsement sa ilang mga barangay kapitan o local government unit (LGU) nga nagpamatuod nga sila mga kabos ug angay makabaton og student permit o driver’s license.