SUPERBALITA CEBU

Archdiocese, Smart milusad sa ‘Panaw sa Pagtuo’ exhibit

■ PANAW SA PAGTUO: (gikan sa wala) Sila si Fr. Mhar Balili, event chairperson sa 500YoC; Cebu Archbishop Jose Palma; Atty. Maria Jane Paredes, senior manager, Smart Public Affairs Vismin; ug Fr. Bryan Brigoli, chairman sa Commission on Culture and Heritage sa Archdiocese of Cebu, namirma sa kasabutan alang sa panagtambayayong sa paglusad sa 500 YoC Panaw sa Pagtuo Mobile Exhibit App ug sa 21 Historical Snippets. / Amper Campaña

NAGPINIRMAHAY og kasabotan ang Archdiocese of Cebu ug Smart Telecommunications sa paglusad sa 500 YoC Panaw sa Pagtuo Mobile Exhibit App ug sa 21 Historical Snippets sa Martes, Septiyembre 29, 2020 sa Cebu Metropolitan Cathedral Archdiocesan Museum.

Nihatag sa ilang suporta ang Smart Telecommunications sa Archdiocese of Cebu sa paglusad sa pakighiusa sa kasaysayan, turismo ug sa simbahan pinaagi sa mga online travel guide, QR code technology ug interactive nga turismo.

Sa kasaulugan sa 500YoC sa sunod tuig ug sa teknolohiya sa Smart Telecom, pormal nila nga gilusad ang 500 YoC Panaw sa Pagtuo Mobile Exhibit App.

Pinaagi sa mobile app, makita ang kasaysayan sa mga simbahan, museyo, ug mga mahinungdanon nga mga hitabo kaniadto nga mamahimong ma-access sa mga mobile phone.

Gilusad usab nila ang 21 historical video series nga nag-highlight sa mga simbahan, museyo, ug sementeryo sa Cebu.

Si Cebu Archbishop Jose Palma, sa usa ka press conference nga gipahigayon sa Cebu Metropolitan Cathedral Archdiocesan Museum, niingon nga ang mga deboto makapaabot og simple nga pagsaulog sa Kristiyanismo, apan mas mahinungdanon tungod kay kini pahinumdom sa mga Sugbuanon sa unang bunyag.

Dugang niya nga opisyal nga ilusad ang pagsaulog sa umaabot nga Abril 4, 2021.

Tungod sa pandemya, niangkon si Palma nga ang ilang mga kalihukan gisibog una hangtod sa 2022.

WAY SIMBANG GABI

Sa samang higayon, gipahibawo ni Palma di madayon ang tradisyunal nga Simbang Gabi alang sa siyam ka mga parokya sa Sugbo nga iya untang pangulohan karong 2020.

Kini himuon unta sa Bantayan Island, San Nicolas, Boljoon, Dalaguete, Argao, Carcar, Barili, Cebu Metropolitan Cathedral ug Dakbayan sa Mandaue.

Apan tungod sa kapeligro sa pandemiya ug gidili ang mga pagtapok, adto na kini sa 2021.

Gipaambit usab ni Palma nga sa Abril 2021 unta mahitabo ang climax sa pagsaulog sa ika 500 ka tuig sa pagka Kristiyanos sa Pilipinas, apan gihimo kini nilang sinugdanan ug sa Abril 2022 na mahitabo ang pagtapos.

“The whole idea is because we could not control Covid-19 and if we could not gather people, there is not much significance. How do we feel the enjoyment of Sinulog if there are no people gathering,” ingon ni Palma.

Bisan gani sa Roma, giingon ni Palma nga ang mga kalihokan nga espirituhanon gisibog lang una sama sa pagsaulog sa International Eucharistic Congress sa Budapest ug World Youth Day sa Portugal nga gisibog una sa sunod tuig.

Matod ni Palma nga gisultihan ni Papa Francis ang mga kardinal nga sundon ang mga palisiya nga gipatuman sa gobyerno labi na karong panahon sa pandemya.

Gani, giklaro sab kini ni Palma ngadto sa lokal nga gobyerno sa Sugbo nga motuman ang simbahang Katoliko sa tanang ipatuman nga sumbanan sa gobyerno.

Sa laing bahin, bisan paman nga ang 500 nga kasaulugan sa YoC opisyal nga buksan sa sunod tuig, ang Archdiocese of Cebu kauban ang Smart Telecommunications nag-andam og lainlaing kalihokan subay sa kasaulugan ngadto sa social media sa matag Sabado nga nagsugod sa Septiyembre 26 hangtod Marso 21, 2021. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph