Labella andam makigtagbo sa e-scooter groups

ANDAM makigtagbo si Mayor Edgardo Labella sa grupo sa e-scooter rider para ma-regulate ang ilang paggamit ug di dakpon sa mga traffic enforcer sa Dakbayan sa Sugbo.

Ang Cebu City Tranaportation Office (CCTO) nipahibawo na sa publiko nga bisan unsang adlawa mamahimo silang molusad og operasyon batok sa mga e-scooter sanglit gidili kini sa balaud sa trapiko.

Si Atty. Gerry Carillo, kanhi Cebu City councilor ug consultant ni Labella, maoy gitahasan sa mayor sa pagpakig-atubang sa mga e-scooters owner aron mahatagan og maayong solusyon ang ilang problema.

“I am open, I am willing. I am for regulation of the e-scooters. I am willing to listen to the proposal of the e-scooter group,” padayag ni Labella sa mga tigbalita.

Di na bag-o sa mayor ang maong sitwasyon kay siya mismo nasayod unsa kamahinungdanon alang sa mga e-scooter rider sanglit ang iyang anak nga nag-eskwela sa Manila nigamit sab og e-scooter apan iyang gihulagway nga dagko ang mga karsada ug sidewalk sa kaulohan.

Ang CCTO, ubos sa liderato ni Alma Barandog-Casimero, nibutyag nga matag karon ug unya, sila manakop sa mga e-scooter nga gigamit ug nisubay sa mga national highway sanglit subay sa Traffic Code sa Cebu City, ang maong matang sa sakyanan wa gitugotan nga makadagan sa kadalanan.

Gumikan sa anunsyo sa CCTO, ang mga e-scooter owner nihangyo nga di sila dakpon, inay tabangan sila ug i-regulate ang paggamit sanglit andam silang motuman.

Ang DOTr wa pa mahuman sa ilang guidelines para sa regulasyon sa e-scooters, apan unang nibutyag nga kinahanglan ang user niini adunay driver’s license. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph