DILI tanang ahensiya ug institusyon sa kagamhanan ang motutok sa gubat batok sa coronavirus disease 2019 (Covid-19). Ang Department of Health (DOH), nag-unang ahensiya sa panglawas, nakakuha na og igong kasinatian ug pagsabot sa virus ug pagdumala niini.
Ubos na sa modified general community quarantine (MGCQ), nagpasabot nga abli na halos tanang pamatigayon, mas gikinahangkan ang kolaborasyon ug inisyatiba sa ubang ahensiya sa kagamhanan nga motutok sa dinalian ug ang malahutayong plano sa pagpahiuli sa nasudnon ug lokal nga ekonomiya.
Dili sayon ang pagpabangon sa negosyo karon. Ang tanan pulos apektado sama sa indibiduwal, kompaniya ug kanasoran. Buot usab mobangon sama kanato. Busa ang kolaborasyon maayong diskarte ug mamugnaon alang sa lokal o domestic ug internasyonal nga pamuhonan.
Dalaygon ang gihimo ni Secretary Michael Lloyd Dino, Presidential Assistant for the Visayas (Opav), sa pag-adto sa China ug pagdapit og mamuhonan taliwala sa daghang nga isyu nga pulitikanhon sa China, ang kamatuoran nga kini maoy labing duol nato sa Pilipinas nga adunahang nasod. Halapad ang opurtunidad sa kolaborasyon.
Ang China tradisyonal nga kaabin sa nasod sukad pa sa pre-colonial nga pamatigayon o sa wala pa moabot ang kolonyalistang Espanyol, pagpanakop sa Estados Unidos, Japan ug balik sa US, ang Sugbo usa sa mga sentro sa kinaraang barter trading.
Ug nagbunga ang inisyatiba sa Opav human ang kagamhanan mismo sa Fujian Province sa China nagpadala og suwat kang Secretary Dino nga interesado sa kolaborasyon sa “areas of common deveopment.”
Hinaut nga malihok dayon kini, dili lang kutob sa pulong, Opav. Malaumon kita ang Sugbo mahibalik sa naandang kaalegre sa negosyo ug turismo.