NAHIMO na sab nga sumsuman ang padayon nga “kaguliyang” sa House of Representatives tungod sa gitawag og term-sharing deal tali kanila ni Speaker Alan Peter Cayetano ug ni Cong. Lord Velasco.
Kon si Cayetano pa, “gentlemen’s agreement” kuno to.
Nganong nagubot man?
Siyempre nagubot kay duna may nagplano nga dili na tumanon ang maong kasabotan.
Kon tumanon lang unta sa masig-ka-panig ang ilang kasabotan, segurado nga way gubot.
Mao bitaw nang gitawag og agreement kay nagkasabot sila nga ilang tumanon ang masig ka kondisyon, 15 ka bulan ka Cayetano ug 21 ka bulan ka Velasco.
Tungod sa maong panagsabot, nalikayan ang kagubot kaniadtong panahona sa isyu kon kinsa ang molingkod nga Speaker of the House.
Tulo sila nga interesado–Cong. Cayetano, Velasco ug Martin Romualdez.
Kaniadtong panahona, si Velasco ang giuyonan sa kadaghanan sa mga kongresista nga angayan nga molingkod samtang, matod pa, gamay lang sa mga kongresista ang misuporta kang Cayetano.
Apan tungod sa pag-apil ni Presidente Rodrigo Roa Duterte (PRRD) isip referee sa maong kagubot, nahilot kini ug migawas, matod pa, ang win-win situation. Ug sumala sa kasabotan, 15 ka bulan ka Cayetano, 21 ka bulan ka Velasco ug majority floor leader na lang si Romualdez. Naundang ang kagubot ug milingkod dayon si Cayetano nga Speaker.
Apan karon nga hapit na moabot ang tumoy sa pisi, naunsang pagka-unsaa nga nausab na man ang huyop sa hangin?
Kanus-a kaha masolbad ang mga pagpamatay sa lain-laing lugar sa Negros Oriental, labi na kadtong gihimo sa riding in tandem?
Nagsunodsunod kini apan hangtod karon, wala pay klaro kon kinsa ang naghimo ug nagsugo niini, ingon man ang motibo sa pagpatay.
Sama sa nagpatung-atong na lang ang mga kaso nga ingon niini og daw wa nay kasolbaran.
Hangtod karon, nagpabilin nga dakong misteryo ang maong mga krimen ug wala pa masayri kon masolbad ba gyod kaha kini.
Atol sa pagsaulog sa World Rabies Day kaniadtong Lunes, Septiyembre 28, nindot nga atong masabtan ang mga responsibilidad sa atong pagbuhi sa mga iro o mga iring.
Puslan man nga magbuhi kita, angayan nga atong masabtan kon unsay atong angay buhaton (ug dili buhaton) kon duna kitay buhi nga iro ug iring.
Hustong pagkaon ug tubig, hustong pagpanglimpiyo sa gipuy-an sa mananap, pabakunahan kini sa anti-rabies vaccine, og pagpakita sa hustong kinaiya ngadto sa maong mga mananap, dili kay pasagdan lang nga magsuroy-suroy bisan asa, bisan unsay kan-on og walay klaro nga puy-anan.
Atong hinumdoman nga dili matumbasan sa kwarta ang atong kalipay nga matagamtaman kon himsog ug malipayon ang atong mga binuhi nga iro ug iring.
Makalipay, hugot nga molaban, anti-stress, mao kini ang pipila ka mga rason sa atong pagbuhi sa og makapabalik sa atong pagsalig sa mga mananap kon atong masabtan ang mga responsibilidad sa pagbuhi kanila.
Mao man gani nga gitawag ang iro ug iring nga “man’s best friend” tungod niini.
Nindot ang gihimo ni Gov. Art Yap sa Bohol sa paghangyo sa PAL ug Cebu Pacific nga mobalik na sa ilang pagbiyahe ngadto sa Bohol ug mahunong na ang kasamtangan nga monopoliya sa Air Asia pinaagi sa sweeper flights.
Mao kini ang tubag ni Gov. Yap sa mga reklamo sa mga katawhan sanglit nabatyagan nga mahal kaayo ang plitehan sa Air Asia. Apil sab kini sa programa sa hinayhinay nga pagpabalik sa turismo.