SUPERBALITA CEBU

Cebu MGCQ pa; Mayors: Covid naa ra

ANG Dakbayan ug tanang mga lugar sa Sugbo ubos gihapon sa modified general community quarantine (MGCQ) gikan sa Oktubre 1 ngadto sa 31, 2020.

Mao kini ang pahibawo ni Health Secretary Francisco Duque III atol sa ilang tigom ni Presidente Rodrigo Duterte sa gabii sa Lunes, Septiyembre 28.

Ang MGCQ mao ang labing lugak nga quarantine level panahon ning coronavirus pandemic.

Sila si Cebu City Mayor Edgardo Labella ug Mandaue City Mayor Jonas Cortes ninghangop sa pagpabilin sa Sugbo ubos sa MGCQ.

Alang sa duha ka mga mayor sa highly urbanized cities nga di pa angay nga mokanaug ngadto sa “new normal” ang Sugbo kay naa pa ang coronavirus disease naghulga.

Si Labella nagkanayon nga labing maayo nga adunay regulasyon nga ipatuman sanglit anaa pa ang presensiya sa Covid-19 hilabi pa nga nagsingabot ang Kalag Kalag diin modagsa ang mga tawo sa sementeryo.

“Maayo para nato kay kinahanglan man gyud ta nga aduna pay mga restriction. Kon ato na ning wagtangon ang restriction unya ang virus naa pa gatuyoktuyok pa, dilikado kaayo,” matod ni Labella.

Sa miaging upat ka mga adlaw, ang Cebu City nitala og 9, 7,5,3 ka mga kaso matag adlaw. Kon tan-awon, nag-anam og kunhod ang gidaghanon sa nataptan sa Covid-19.

“Mapasalamaton ta because of the concerted effort of all different groups, sectors in Cebu City. We have flattened the curve. In fact, gahapon tulo ra ka cases nga natala sa siyudad sa Sugbo,” dugang sa mayor.

Apan taliwa sa paglambo sa Covid-19 situation sa dakbayan, di gihapon kini angay nga ipanghambog, inay magsilbing hagit sa matag-usa ang hingpit nga pagpapas sa virus.

“ But as I have said over and over again that let us not be complacent, let us not flaunt this. Let us not aggrandize this but we should serve this as a challenge to all of us to be more vigilant, circumspect and careful sa atong inadlaw adlaw nga bulohaton and strictly comply with the basic health protocol,” dugang ni Labella.

Aron pagpugong sa pagkuyanap sa virus, ang mayor nipirma og executive order para sa pagsirado sa mga sementeryo gikan sa Oktubre 30 hangtod Nobyembre 3 para way tawo sa sulod sa sementeryo atol sa Kalag Kalag.

Si Cortes sama og sentimyento ni Labella.

“We welcome the pronouncement that Mandaue City will remain under MGCQ. Although we are recording lesser cases, it is still not the time to be complacent,” matod sa mayor.

“We need to continue to practice all health protocols in order to really flatten the curve.I ask every mandauehanon to remain vigilant,” dugang ni Cortes sa iyang text message sa Superbalita Cebu. (PAC, KFD, Sunstar Philippines)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph