PRISUHON sulod sa usa ka tuig o pamultahon og P5,000 ang turista nga mosuroy sa mga nindot nga mga talan-awon sa Probinsya sa Sugbo, apan dili gusto mosubay sa mga lagda nga gilatid sa Lalawigan taliwa sa hulga sa coronavirus disease.
Mao kini ang nalatid sa ordinansa nga gipasar sa Hunta Probinsyal atol sa out-of-town session sa Septiyembre 28.
Ang ordinansa nga nag-ulohan og “protocols and guidelines to govern tourism-related activities that promote the health and wellness of an individual, accommodation establishments, and the dine-in of persons in restaurants in the province of Cebu” maoy maghatag og ngipon sa kamandoan ni Cebu Governor Gwendolyn Garcia nga mao ang Executive Order No. 20-A.
Si Bokal Red Duterte sa 5th district ug chairman sa committee on tourism, nagkanayon nga labing gikinahanglan kining ordinansa aron masiguro nga masubay ang mga lagda paglikay sa Covid-19.
“Needed gyud ni nga ordinance kay naa pud uban tourism stakeholders nato nga naglibog bitaw nganong sila nituman unya ang uban wa. So, para ma usa na lang gyud, para motuman gyud tanan, mao na we put it into an ordinance,” matod ni Duterte. (ANV)