NIMANDO ang hepe sa Police Regional Office 7 sa Regional Intelligence Division (RID) sa pagsusi kon kinsa ang kakunsabo ni Jennifer Mercader, kanhi kapitan sa Barangay Lugo, lungsod sa Borbon, nga nieskapo sa Medellin District Jail ug nitago sa Negros Occidental sulod sa kapin usa ka tuig, apan napatay.
Nagtuo si Police Brigadier General Albert Ignatius Ferro nga ang drug group ni Mercader maoy nisagop kaniya aron makatago siya sa lungsod sa Murcia, bukirang dapit sa probinsya sa Negros Occidental.
Si Mercader, gawas nga niangkon nga hitman siya diin ang iyang gipamatay mao kadtong mga kriminal, giingong nalambigit usab sa pagpamaligya sa illegal nga drugas.
Naengkwentro sa mga sakop sa RID sa Police Regional Office 6 si Mercader atol sa gilusad nga anti drug operation.
Nakuha gikan sa suspek ang dul-an sa P500,000 nga balor sa illegal nga drugas ug duha ka armas nga matod pa maoy gigamit sa pagsukol sa mga pulis.
Si Mercader napatay sa giingong engkwentro.
Human niikyas niadtong Marso 5, 2019 sa Medellin District Jail, didto na kini nidiretso sa Negros Occidental diin aduna matod pa mga higala nga kauban niya sa illegal nga negusyo. (AYB)