DAKONG pagmaya sa tulo ka barangays sa Carmen ang nakabaton na sila ug patubig nga magamit nila sa inadlaw-adlaw nga panginahanglan.
Si Rep. Vincente “Duke” Frasco ni turn over ug tagsa tagsa ka Level 2 o communal water system alang sa barangay Dawis Sur, Dawis Norte, ug Cogon East. Ang maong proyekto nibalor ug P2 million kada barangay ug gi-implementar sa Department of Public Works and Highways (DPWH). Opisyal kining gidawat ni Barangay Kapitan Cesar Dueñas sa Dawis Sur, Barangay Kapitan Aireen Bontia sa Dawis Norte
ug Barangay Kapitan Rosalyn Bontia sa Cogon East.
Daghang katuigan nga ang lungsod sa Carmen maoy tinubdan sa tubig nga gigamit sa Metro Cebu, apan mismo ang taga Carmen nag-antos sa problema nga wala silay tubig sa ilang panimalay.
“Dugay nang uhaw ang mga tawo sa tinud-anay nga panerbisyo. Karon, makatagamtam na ug kahupayan tungod kay aduna nay agas sa tubig nga dugay nang gihandum sa katawhan,” matod pa ni Kongresman Duke.
Gawas sa patubig, si Frasco adunay laing mga dinagkong proyekto alang sa kinto distrito. Usa niini mao ang pag-abli ug dalan gikan sa Liloan padung sa Asturias, nga moagi lang sa Compostela ug Danao. Nagpa semento pud siya ug ubang mga dalan sama sa P80 million nga dalan sa Poro, Camotes.
Alang kang Frasco, ang kwarta sa katawhan angay nga i-uli sa katawhan, mao nga nang-apod apod siya ug hinabang medikal ug uban pa. Ang mga tawo sa dakbayan sa Danao bag-o lang nakadawat ug balor P3.5 million, samtang 300 ka mga taga Camotes ang gihatagan sad ug hinabang sa niaging semana.
“Ang pagkasakit o kalisud, pagka ospital o ang kamatayon, wala’y pili. Sa atong pag-alagad, dili mi mangutana unsa imong partido. Ang pangutana ra, nanginahanglan ba ka ug tabang?” nagkanayon ang kongresista. (PR)