NAGPAGAWAS og direktiba ang amahan sa Magsaysay, Davao del Sur alang sa pag-obserba sa Kalag-Kalag pinaagi sa Executive Order 28 niadtong Martes, Septiyembre 29, 2020.
Sa gilagdaang mando ni Mayor Arthur Davin, nasayran nga abri ang ilang mga sam-ang gikan sa Oktubre 13 ngadto 28 gikan alas 6 sa buntag hangtud alas 6 sa gabii.
Dili sab mahimong mag-overnight sa maong mga petsa ug gikinahanglan nga 100 ka mga tawo lang ang tugtang managkot og kandila sa sementeryo.
Apan gimando ni Davin nga sirad-an ang ilang sam-ang gikan Oktubre 29 ngadto sa Nobyembre 4.
Gumikan niini, walay bisan usa nga mahimong mobisita sa lubnganan sa maong adlaw.
Ang tanang mobisita sa mga sam-ang nga dili residente sa lungsod gikinahanglan nga magdala og medical certificate ug quarantine clearance gikan sa lugar nga ilang gigikanan.
Gidason ni Davin nga kinahanglang way malapas sa mga gitakdang balaod ilawom sa Inter-agency Task Force on Covid-19.