MAAYONG adlaw sa tanang Super Suki sa Suoerbalita bisan asang dapita ka man karon.
Usa ka babaye nga giila sa Seventh Day Adventist nga propeta sa salin nga Iglesia nagsulat ug nagkanayaon: "The greatest want of the world is the want of men-men who will not be bought or sold; men who in their inmost souls are true and honest; men who do not fear to call sin by its right name; men whose conscience is as true to suty as the needle to the pole; men who will stand for the right though the heavens fall."
Nagkaguliyang ang mga Kongresista tungod sa isyu sa liderato diin nahuman na ang kinse ka bulan nga termino sa pagka Speaker ni Congressman Alan Peter Cayetano.
Nanukad na aron mopuli si Marinduque representative Lord Allan Velasco sulod na nabilin nga biyente-uno ka bulan sa administrasyon ni Pangulong Rodrigo Duterte apan dunay mga babag nga gibutang sa iyang agianan aron maka lingkod sa pinakataas nga pwesto sa usa ka sakop sa kongreso.
Kahinumdoman nga nahimo ang “term sharing” nga kondisyon aron walay mahiubos kanilang duha kay parehong mga suporter ni President Digong sa iyang pagpapili pagka presidente sa nasud niadtong 2016.
Mipakitag katag si Cayetano sa iyang pagdumala sa Kongreso diin iyang gipaluyohan ang mga proyekto sa presidente apil ang pagpasira sa higanteng network sa ABS-CBN nga gisaad ni President Digong nga iyang bungkagon ang monarkiya sa nasud.
Tungod sa national budget alang sa tuig 2021 mas nidaghan ang mga suporter ni Cayetano apan duna sab uban nagpabilin nga sa pundok ni Velasco.
Maayo kuno ang pagdumala ni Cayetano matud sa iyang mga kaalyado apan dapat lang tumanon ang kasabutan matud sa kampo ni Velasco. Dili angayan ilisan si Cayetano labi na nga nia ta sa panahon nga tandugon matud sa iyang kampo.
Sa ikaduhang higayon sa ilang pag-atubang kang Digong sa Malacañang kalabot sa maong isyu, misaad si Cayetano nga mosanong sa ilang kanhing kasabutan apan katungod daw sa mga Kongresista ang pagpili kinsa ang lider nga ilang naangayan, busa wala sa iyang mga kamot ang ilang mga huna huna ug desisyon.
Sa milabay nga semana, nabaniog nga modeklara kuno og vacancy sa Congress si Davao City 1st District Representative Paolo Duterte apan wala natigayon. Gibalita nalang nga mianhi sa dakbayan sa Davao si Cayetano kay nakigkita kaniya niadtong milabay nga gabii sa Sabado ug daghan ang nagatoo nga dunay kalabutan sa speakership isyu ang gianhi ni Cayetano.
Sa pagtan-aw sa mga oposisyon, ang kasamtangan nga isyu sa Kongreso, timailhan nga nagakahinay og bungkag na ang kampo ni Duterte nga padulong na sa pagkahugno.
Ang isyu sa kurapsyon sa gobyerno nakadugang sa mga hinungdan nga mahugno ang administrasyon ni Duterte.
Gisaad ni Digong dihang nangampanya pa siya nga iyang paphaon ang kurapsyon diha sa gobyerno apan sa milabay nga mga adlaw ang Presidente miangkon nga lisud wagtangon, lisud sumpuon ang kurapsyon, timailhan nga daghan ang kawatan sa kwarta sa gobyerno nga alang unta i-serbisyo sa katawhan.
Luyo sa mga hitabo sa atong nasud, nagpabilin gihapon ang popularidad ni Digong kay giila gihapon siya sa katawhan ang iyang liderato.
Iyang ginaangkon ang kapakyasan sa usa sa iyang gisaad sa katawhan.
Sa kaisog nga iyang gipakita duna man gani nangahas sa pagpangawat sa kwarta nga alang unta sa pagserbisyo sa katawhan, daw unsa pa kaha sa milabay nga administrasyon? Kini ang pangutana sa uban.
Atong balikan ang punto kalabot sa baroganan sa mga naa sa katungdanan. Masaligan ba gihapon nato sila sa ilang mga gipangsulti? Unsa ba ka bililhon alang kaninyo ang palabra de honor?
Unsa man sa inyong pagtan-aw ang mga hinungdan nga pwede na kalimtan ang mga kasabutan labi na kon walay piho nga kasulatan kay gihimo nga pulong lang ang basihan?
Ang kasabutan nga gihimo uban sa pinakataas nga opisyal sa nasud isip saksi, usa ka lig-on nga kasabutan kon dili lang matabunan sa kahakog ug personal nga mga ambisyon kana kon usa lang ang imong sinultihan. Kamo nay tubag sa pangutana kon ang palabra de honor naa pa ba?