USA ang Pilipinas nga adunay labing daghang sumosunod sa 16-time champion Los Angeles Lakers apan gumikan sa Fil-Am coach sa Miami Heat nga si Erik Spoelstra, nabahin ang pagbati sa mga Pinoy kabahin sa 2019-20 National Basketball Association (NBA) Finals nga sugdan karong adlawa sa Lake Buena Vista, Florida.
Giangkon sa basketball personalities sa Sugbo nga nahinabi ning mantalaan nga inilog ang Lakers ning maong panagparang apan adunay naghandom nga molampos ang Heat tungod ni Spoelstra.
Ang basketball organizer ug athletic director sa Sacred Heart School-Ateneo de Cebu nga si Rico Navarro miingon nga dako og bintaha ang Los Angeles niiing series apan ang iyang kasing-kasing anaa sa Heat.
Giklaro niya nga bisag asa nga departamento niya tan-awon, molabaw ang Lakers sa matchup kay anaa nila si four-time MVP ug three-time champion Lebron James ug All-Star center Anthony Davis.
Wala pay labot niini ang mga backup sa Lakers nga naglakip nila Kyle Kuzma, Dwight Howard, Danny Green ug uban pa.
“They have nothing to lose being underdogs. I wouldn’t be surprised if coach Spoelstra comes up with schemes to throw off Lebron and Anthony Davis,” ingon ni Navarro.
Si coach Van Halen Parmis miingon nga inilog ang Lakers kay kompleto man ang puwersa niini apan matod niya nga kon mapugngan sa Heat ang core group sa Lakers, aduna kini poruhan.
Niuyon pud ang kasamtangang high school Most Valuable Player (MVP) sa Cebu Schools Athletic Foundation Inc. (Cesafi) nga si LA Casinillo sa pamulong sa duha ka basketball organizers sa Sugbo.
Alang ni Casinillo, duha ang rason nga makapaikag nga NBA Finals – tungod ni James ug Spoelstra.
“Ako maingon lang kay excited na kaayo ko motan-aw labi na si LeBron magka kontra sa iya former team ug iyang former coach. Dili sab makompiyansaan ang Heat kay lingin baya ang bola anything can happen in a game,” saysay ni Casinillo.
Ang Southwestern University-Phinma high school coach nga si Jerry Abuyabor nagtuo nga humanon sa Lakers ang maong series sulod lang sa lima ka mga duwa o 4-1 advantage.
Ingon niya nga tungod kini sa kay mas daghang masandigan ang Lakers kumpara sa Heat nga aduna ra’y 8-man rotation.
“Lakers bench can sustain a long game. Most top picks naa sa LA while Miami mga under rated players who can really play great. Experience wise LA got it,” matod ni Abuyabor.
Unang higayon sa Lakers nga nakabalik sa finals sulod sa 10 ka mga tuig samtang ang Heat katapusang nakaduwa sa finals niadtong 2014. /