GIKAN sa Septiyembre 1 ngadto sa 30 ang, ang Cebu City Transportation Office (CCTO) naka-impound og 834 ka mga sakyanan, kadaghanan niini mga motorsiklo.
Sa mao nga gidaghanon, 646 ang mga motorsiklo, 82 ang trucks, 88 ang trailers, 17 ka traysikol ug usa ang taxi.
Lakip sa ilang na-impound ang usa ka electric bike ug duha ka electric scooters.
Niabot sab og 568 ka mga sakyanan ang na-clamp sa CCTO sulod sa 30 ka mga adlaw.
Labing uwahi nga pag-clamp nahitabo sa kaadlawon sa Miyerkules, Septiyembre 30, diin 112 ka mga sakyanan ang na-clamp gumikan sa overnight parking.
Samtang, niabot usab og 18,007 ka mga traffic citation tickets sa tibuok Septiyembre 2020 ang ilang na-issue.
Ang traffic violations dunay multa nga P500 ngadto sa P1,000 ug tag P1,500 ang wheel clamping ug towing sa motorsiklo ug four-wheel nga mga sakyanan.
Gipasabot ni Alma Fe Barandog-Casimero, pangu sa CCTO, nga nidaghan ang ilang nadakpan gumikan kay kada adlaw aduna silay operasyon nga gihimo sama sa pag-check sa mga delivery permit sa mga trucking company ug mga nagnegusyo og delivery.
Matod pa sa hepe sa CCTO nga nakadugang sab sa gidaghanon sa mga sakyanan nga anaa sa kadalanan nagdagan human gipaubos sa Inter Agency Task Force (IATF) ang Cebu City ilawom sa modified general community quarantine.
Si Casimero nidugang nga full-force na ang CCTO sa ilang pag-manage sa traffic situation sa siyudad kay grabe na kadaghan ang mga sakyanan.
Gibana-bana sa hepe sa CCTO nga karong Oktubre, kon dili mausab ang batasan sa mga motorista ug padayong nga molapas sa mga lagda sa trapiko, matupngan o malabwan pa nila ang gidaghanon sa ilang maisyohan og TCT.