ANG Cebu City Government, pinaagi sa Emergency Operations Center (EOC) nakapahigayon og swab test sa 295 ka stall owners sa Carbon market atol sa ilang unang adlaw sa massive testing, Septiyembre 30, 2020.
Kini ang gibutyag ni Konsehal Joel Garganera, deputy chief implementer sa EOC, human ilang gisugdan kagahapon ang testing nga gikatakdang matapos sa Oktubre 2.
Si Market Administrator Irvin Cabales nagkanayon nga samtang nagpaabot pa sa ilang resulta, makapadayon gihapon pag-abli ang tindahan sa vendors, apan lahi una ang ilang pabantayon o patindahon.
Kini aron di mawagtangan sa ilang panginabuhian ang vendors ug masiguro ang ilang kaluwasan. Si Garganera nagtuo nga karong adlawa modaghan pa ang vendors nga magpakuha sa ilang samples para sa rapid diagnostic test ug polymerase chain reaction.
Gihulagway sa konsehal nga nakaapekto kagahapon ang kainit mao nga karong adlawa ila nang gipun-an ang mga tolda ug mga electric fan sa Warwick Barracks nga espasyo.
Ang pangulo sa Cebu Market Vendors Multi-Purpose Cooperative (Cemvedco) nga si Erwin Gok-ong nibutyag nga hapsay ug napatuman ang social distancing sa vendors dihang gikuhaan sila og para sa Covid test.
Ilang tinguha mga makapaubos sa Covid testing ang dul-an 2,000 ka vendors, lakip na ang mga ambulant nga naninda daplin sa karsada hangtod Oktubre 2. (PAC)