NANGANDAM ang kapulisan sa Central Visayas sa pagbalik na sa pag-operate sa small town lottery (STL) karong adlawa, Oktubre 1, 2020, aron masiguro nga legal lang nga mga operator ang makabalik.
Matod ni Police Brigadier General Albert Ignatius Ferro, hepe sa Police Regional Office 7, nga ilang panakpon kon adunay makita nga mga stall sa STL nga way lisensya sa Philippine Charity Sweepstakes Office (PCSO).
“Only the legal STL operator will be able to do the STL operation. So, kanang mga illegal, they will be arrested, our operation on anti-illegal gambling will continue,” matod ni Ferro.
Ang dakbayan sa Sugbo maoy usa sa labing daghan nga STL operator.
Tungod niini, matod ni Police Colonel Josefino Ligan, officer-in-charge sa Cebu City Police Office, nga makig-alayon sila sa PCSO aron masayran unsa kining mga illegal nga operator sa STL.
Iyang gipasabot nga kon naa na silay listahan sa legal nga operator, dali ang pag-ila kinsa kining mga illegal nga nag operate sa siyudad sa Sugbo.
“Kon naa mi makit-an nga booth nga dili ilaha sa legal, dakpon namo na diretso,” matod ni Ligan.
Dugang ni Ligan nga ang chairman sa PCSO nga si kanhi Police Colonel Royina Garma mobisita sa dakbayan Sugbo alang na sa pag-ila sa mga STL nga adunay pagtugot sa PCSO.