USA ka law enforcer giingong milapas sa protocol sa coronavirus disease (Covid-19) pinaagi sa pagduaw sa usa ka pampublikong buhatan bisan kon siya napaubos sa swab test ug wa pa mogawas ang resulta.
Gumikan niini, nimando og imbestigasyon ang hepe sa Police Regional Office (PRO) 7 labot sa giingong paggawas sa usa ka agent sa Philppine Drug Enforcement Agency (PDEA 6) nga unta mag quarantine, apan nibisita hinuon sa Cebu City Palace of Justice niadtong Septiyembre 21, 2020.
Human nasayod si Regional Trial Court Executive Judge Macaundas Hadji Razul, siya nidesisyon dayon nga ipaubos sa lockdown ang tibuok Qimonda building diin nahimutang ang tanang korte sa dakbayan sa Sugbo.
Matod ni PRO 7 Chief Albert Ignatius Ferro, nakalapas sa quarantine protocol ang agent tungod kay kon gipaubos sa swab test, kinahanglan mag quarantine sulod sa pipila ka adlaw sa di pa mogawas ang resulta.
“We are always reminding every single day the observance of the minimum health standard and for those who have been tested, they should be quarantined. They should not go out before the result, di ba? I will ask the PDEA to explain why they are tested and then they are not yet allowed to go out if their result haven’t been released,” matod ni Ferro.
Ang agent giingong sakop kini sa PDEA region 6 ug adunay gitambongan unta nga hearing sa iyang kaso sa usa sa mga sala sa korte sa dakbayan sa Sugbo.
Tungod sa maong insidente, matod ni Ferro nga molusad silag sub-sub nga contact tracing kon kinsa pa ang nakahalu-bilo niini sa wa pa siya maka adto sa korte.
Gipaubos na sa isolation ang maong agent, kinsa posibling mag-atubang og kaso nunot sa kalapasan sa quarantine protocol. (AYB)